रत्नागिरी: मुख्यमंत्री एकनाथ शिंदे येत्या गुरुवारी (३० नोव्हेंबर) रत्नागिरीत येत आहे. खेड तालुक्यातील लोटे येथील एमआयडीसीमध्ये सुरू होणाऱ्या कोका कोला कंपनीचे भूमिपूजन आणि रत्नागिरीतील वैद्यकीय महाविद्यालयाचे लोकार्पण मुख्यमंत्री शिंदे यांच्या हस्ते होणार आहे.
मुख्यमंत्र्यांच्या दौऱ्याची पूर्वतयारी म्हणून उद्योग मंत्री तथा पालकमंत्री उदय सामंत यांनी आज संबंधित यंत्रणेचा दूरदृश्यप्रणालीद्वारे आज आढावा घेतला. जिल्हाधिकारी कार्यालयातील सभागृहात जिल्हाधिकारी एम. देवेंदर सिंह, मुख्य कार्यकारी अधिकारी कीर्तीकिरण पुजार, पोलीस अधीक्षक धनंजय कुलकर्णी, निवासी उपजिल्हाधिकारी चंद्रकांत सूर्यवंशी, प्रांताधिकारी जीवन देसाई, जिल्हा शल्य चिकित्सक डॉय संघमित्रा फुले, खेड तहसीलदार सुधीर सोनवणे, विविध विभागाचे अधिकारी व कर्मचारी तसेच विविध महाविद्यालयीन शैक्षणिक संस्थांचे अध्यक्ष, प्रतिनिधी आणि प्राचार्य या बैठकीला उपस्थित होते.
पालकमंत्र्यांनी नमो शेतकरी अभियान, नमो आत्मनिर्भय अभियान, नमो दलित सन्मान अभियान, नमो ग्राम सचिवालय अभियान, नमो स्मार्ट शाळा अभियान, नमो दिव्यांग शक्ती अभियान, नमो घरकुल अभियान, नमो क्रीडांगण उद्यान अभियान आदी योजनांचा आढावाही यावेळी घेतला.
