आंजणारी घाटात ट्रेलरची दोन पादचारी महिलांना धडक; एक महिला जागीच ठार

लांजा:-मुंबई गोवा महामार्गावरील लांजा नजिक आंजणारी घाटात आज गुरुवारी ( दिनांक २३ नोव्हेंबर २०२३ )सकाळी पावणे नऊच्या सुमारास ट्रेलरने दोन पादचारी महिलांना धडक दिली. या अपघातात एक महिला जागीच ठार झाली असून दुसरी महिला गंभीर जखमी झाली आहे.

या अपघातातील ट्रेलर (गाडी नंबर HR 38 V 9794) मुंबईहून गोव्याच्या दिशेने ट्रकच्या चेसिस घेऊन मार्गक्रमण करत होता. चालक सद्दाम हकिमुदिम अन्सारी ( वय 26 वर्षे रा. बिहार जिल्हा कैमुर ) हा आपल्या ताब्यातील ट्रेलर घेऊन आंजणारी घाटाजवळ आला असता रस्त्याच्या बाजूने जाणाऱ्या दोन महिलांना धडक दिली. या धडकेत पल्लवी प्रकाश पेंढारी ( वय 35 वर्षे रा. अंजनारी पेंढारीवाडी ,तालुका लांजा ) ही महीला जागीच ठार झाली. तर जयश्री धोंडीराम पेंढारी (वय 52 वर्षे ) गंभीर जखमी झाली आहे. गंभीर जखमी झालेल्या जयश्री पेंढारी यांना खाजगी वाहनाने लांजा प्राथमिक आरोग्य केंद्रात दाखल करण्यात आले आहे.

दरम्यान अपघाताची माहिती मिळताच महामार्ग वाहतूक पोलिस केंद्र हातखंबाचे स.पो.नि.श्री. बोंद्रे यांच्यासह वाहतूक पोलीस कर्मचारी घटनास्थळी दाखल झाले. यावेळी लांजा पोलीस स्टेशनचे अधिकारी अंमलदार देखील घटनास्थळी दाखल दाखल झाले असून पोलिसांनी पुढील कार्यवाही पोलिसांनी हाती घेतली आहे.