मालवण:- मालवण तालुक्यात तोंडवळी येथे खवले मांजर जाळ्यात अडकलेल्या खवले मांजराची वनविभागाच्या कर्मचाऱ्यांनी सुटका केली. खबर मिळताच वनविभाग कर्मचाऱ्यांनी तातडीने घटनास्थळी जात खवले मांजराला ताब्यात घेऊन पशुवैद्यकीय अधिका-यांकडून तपासणी करुन नैसर्गिक अधिवासात सोडले.
तोंडवळी येथे हॉटेल नित्यानंद या ठिकाणी खवले मांजर जाळ्यात अडकल्याची माहिती हिरेन्द्र घाडी यांनी वनविभागाचे वन अधिकारी श्रीकृष्ण परीट यांना देताच त्यांनी वनकर्मचारी अमोल परब यांच्यासह तात्काळ घटनास्थळी जाऊन ग्रामस्थ हितेंद्र घाडी, सिझर फर्नांडीस, राजन तोंडवळकर,भास्कर पडवळ आदींच्या मदतीने खवले मांजरास सुरक्षित पकडून ताब्यात घेतले. वनविभागाचे उपवनसंरक्षक रेड्डी सहाय्यक वनसंरक्षक सुनील लाड, वनशेत्रपाल कुडाळ, संदीप कुंभार यांचे मार्गदर्शनाखाली सदर खवले मांजराची तपासणी पशुधन विकास अधिकारी मालवण डॉक्टर दळवी यांचे कडून करून घेऊन सुखरूप नैसर्गिक अधिवासात मुक्त केले.
खवले मांजर जैवविविधता परिसंस्थेतील प्रमुख घटक आहे. तसेच तो सध्याच्या काळात दुर्मिळ होत चाललेला प्राणी असल्यामुळे त्याला 1972 च्या कायद्याने संरक्षित केलेले असल्याची माहिती वनविभागाकडून देण्यात आली.
