उक्षी फाटा – वांद्री येथे अपघात, दोन जखमी

रत्नागिरी / प्रतिनिधी:-मुंबई गोवा महामार्गवरील वांद्री – उक्षी फाटा येथे कंटेनर व चारचाकी यांच्यात सोमवारी सायंकाळी 7 वाजण्याच्या सुमारास अपघात झाला. या अपघातात चारचाकीतील चालक जखमी झाला. आतिफ सोलकर (रा. उद्यमनगर, रत्नागिरी) असे जखमी झालेल्या तरुणाचे नाव आहे. तर त्यांचे वडील जावेद यांनाही दुखापत झाली.

कंटेनर चालक रत्नागिरीहून मुंबईच्या दिशेने कंटेनर घेऊन चालला होता. उक्षी फाटा येथे मुंबईहून रत्नागिरीच्या दिशेने जाणाऱ्या चारचाकी गाडीला जोरदार धडक बसली. या धडकेत दोनजण जखमी झाले. घटनेची माहिती मिळताच उक्षी वांद्री येथील तरुण घटनास्थळी पोहोचून मदत कार्य सुरू केले.१०८ रुग्णवाहिकेला बोलावण्यात आले. वांद्री येथे रुग्णवाहिका उपलब्ध नसल्याने संगमेश्वर येथून रुग्णवाहिका येण्यास उशीर झाला. संगमेश्वर पोलीसही घटनस्थळी दाखल झाले होते. घटनेचा पंचनामा पोलिसांनी केला.