कापडगांव येथे तरूणाची गळफास घेवून आत्महत्या

रत्नागिरी:- तालुक्यातील कापडगाव-फणसवाडी येथे होमगार्ड कर्मचा-याने गळफास घेऊन आत्महत्या केली. ही घटना रविवारी दुपारी बारा वाजण्याच्या सुमारास घडली. प्रथमेश राजाराम पाडावे (25, रा.कापडगांव फणसवाडी) असे मृताचे नाव आहे. या घटनेची नोंद ग्रामीण पोलिस ठाण्यात करण्यात आली आहे.

प्रथमेश पाडावे याच्या लग्नाला एक वर्षे दोन महिने झाले होते. रविवारी दुपारी कोणत्यातरी अज्ञात कारणाने होमगार्ड प्रथमेश याने घरातील बेडरुमच्या वाश्याला नायलॉनच्या दोरीने गळफास घेऊन आत्महत्या केली. या बाबत पाली दुरक्षेत्र पोलिस ठाण्यात प्रथमेशचे वडिल राजाराम पाडावे यांनी खबर दिली. खबर मिळताच पाली दुरक्षेत्राचे सहायक पोलिस उपनिरीक्षक संतोष काबळे व मोहन कांबळे यांनी कापडगाव-फणसवाडी येथे धाव घेतली.

पोलिसांनी मृतदेहाचा पंचनामा केला व मृतदेह उत्तरीय तपासणीसाठी जिल्हा शासकीय रुग्णालयात आणला. होमगार्डचे कर्मचारीही पाली व जिल्हा रुग्णालयात दाखल झाले होते. मात्र होमगार्ड प्रथमेशने आत्महत्या करण्यासारखे पाऊल का उचलले या बद्दल माहिती मिळू शकली नाही. या तरुणाच्या अचानक जाण्याने होमगार्ड कार्यालयातील कर्मचारी व कापडगाव-फणसवाडी येथील ग्रामस्थांकडून हळहळ व्यक्त करण्यात येत आहे. सांयकाळी त्याचा मृतदेह नातेवाईकांच्या ताब्यात देण्यात आला. अधिक तपास पाली दुरक्षेत्राचे पोलिस अमंलदार करत आहेत.