सावर्डे येथे अंगणवाडी कर्मचारी व महिला बचतगट मेळावा
चिपळूण:- महिला व बालकास विभाग व महिला आर्थिक विकास महामंडळ यांच्या संयुक्त विद्यमाने सावर्डे येथे आयोजित अंगणवाडी कर्मचारी व महिला बचत गट मेळाव्यात राज्याच्या महिला व बाल विकास आदिती तटकरे यांनी महिला बालविकास विभाग अंतर्गत करीत असलेल्या अंगणवाडी सेविका व मदतनीस यांच्या कामकाजाचे कौतुक करून कोविडसारख्या महामारीच्या काळात केलेल्या कामकाजाचे कौतुक केले.
या मेळाव्यामध्ये महिला बालविकास विभागामार्फत राबवण्यात येणाऱ्या माझी कन्या भाग्यश्री लाभार्थ्यांना मुदत ठेव प्रमाणपत्र देण्यात आली. त्याचबरोबर विभागांतर्गत सुरू असलेल्या अंगणवाडी मदतनीस मिनी अंगणवाडी सेविका पदभरती प्रक्रिया अंतर्गत प्राथमिक स्वरूपामध्ये अंगणवाडी मदतनीस यांना नियुक्ती आदेश देण्यात आले. त्याचबरोबर बालसंगोपन योजनेच्या लाभार्थ्यांनाही बालसंगोपन मंजुरी आदेशाचे वाटप करण्यात आले.
तसेच महिला आर्थिक विकास महामंडळ यांच्या अंतर्गत विश्वकर्मा महिला बचत गट कडवई यांना रुपये १४ लाख, जय हनुमान महिला बचत गट दहा लाख व लक्ष्मी स्वयंसहायता महिला बचत गट सेनवडे यांना दहा लाख रुपये कर्ज मंजुरीच्या धनादेशाचे वितरण करण्यात आले.
सदर कार्यक्रमाच्याप्रसंगी पुरुष सुधारक सन्मान पुरस्कार देऊन पाच जणांचा सन्मान करण्यात आला. सदर प्रसंगी बोलताना ना. आदिती तटकरे यांनी महिला बाल विकास विभाग अंतर्गत करत असलेल्या अंगणवाडी सेविका मदतनीस
यांच्या कामकाजाचे कौतुक करून कोविड सारख्या महामारीच्या काळात केलेल्या कामकाजात बद्दल गौरव उद्गार काढले.
तसेच रत्नागिरी जिल्हा हा पोषण अभियांतर्गत सुरू असलेल्या पोषण ट्रॅकर या कार्यप्रणालीमध्ये आधार वेरिफिकेशन च्या बाबतीत राज्यात प्रथम आल्याबद्दल जिल्ह्यातील सर्व बालविकास प्रकल्पाधिकारी यांचा सुद्धा सन्मान केला. तसेच आमदार शेखर निकम यांनीही अंगणवाडी सेविकांच्या कमी मानधन असूनही काम करण्याची जिद्द व चिकाटी याचे कौतुक केले.
या कार्यक्रमाचे नियोजन व प्रास्ताविक श्रीकांत हावळे उपमुख्य कार्यकारी अधिकारी महिला बालकल्याण जिल्हा परिषद रत्नागिरी यांनी केले. तर कार्यक्रमाचे आभार प्रदर्शन अमरीश मिस्त्री महिला आर्थिक महामंडळ यांनी केले.
या कार्यक्रमाला चिपळूण तालुक्याचे प्रांत अधिकारी आकाश लिगाडे, तसेच महिला बालकल्याणचे सर्व अधिकारी कर्मचारी व बचत गटाच्या महिला उपस्थित होते.
