दापोली: दहावीत शिकणाऱ्या अल्पवयीन मुलीवर अत्याचार केल्याच्या आरोपात अडकलेल्या अडखळ (ता. दापोली) येथील ३५ वर्षीय राजेश मळेकर या तरुणाची खेड येथील सत्र न्यायालयाने निर्दोष मुक्तता केली आहे. ही घटना डिसेंबर २०२० मध्ये घडली होती. या खटल्यात आरोपीतर्फे दापोलीतील ॲड. महेंद्र बांद्रे यांनी काम पाहिले.
तक्रार आणि आरोप:
अडखळ येथील राजेश मळेकर याने दहावीतील मुलीशी तिच्या इच्छेविरुद्ध वारंवार शरीरसंबंध ठेवले. यातून ती गरोदर राहिली आणि तिला अपत्यही झाले. त्यानंतर मुलीच्या आईने दापोली पोलिस ठाण्यात राजेश मळेकर यांच्याविरोधात तक्रार दाखल केली. दापोली पोलिसांनी राजेश मळेकर यांच्यावर बलात्काराचा गुन्हा दाखल केला. मुलगी अल्पवयीन असल्याचे दापोली पंचायत समितीच्या गटविकास अधिकाऱ्यांनी दिलेल्या प्रमाणपत्रानुसार सिद्ध झाल्याने, त्यांच्यावर ‘पोक्सो’ अंतर्गतही गुन्हा दाखल करण्यात आला.
न्यायालयात खटला आणि निकाल:
खेड येथील सत्र न्यायालयात या खटल्याची सुनावणी झाली. न्यायालयाने या प्रकरणात एकूण १४ साक्षीदार तपासले, ज्यात पीडित मुलगी, तिची आई, वैद्यकीय अधिकारी, पोलिस आणि इतर साक्षीदारांचा समावेश होता. खटल्यादरम्यान, पीडित मुलीने आरोपीला ओळखण्यास नकार दिला. तसेच, वैद्यकीय पुराव्यांमध्ये मुलीवर बलात्कार झाल्याचे स्पष्ट झाले नाही. ॲड. महेंद्र बांद्रे यांनी केलेला युक्तिवाद न्यायालयाने मान्य करून राजेश मळेकर यांची निर्दोष मुक्तता केली.
