मकरंद सुर्वे/संगमेश्वर:-ए हरी बोला … ढोल-ताशांचा गजर, ग्रामदेवतेच्या नावाचा जयजयकार करत शनिवारी १५ मार्च रोजी सायंकाळी संगमेश्वर तालुक्यातील शिवने व करंबेळे गावच्या सीमेवर ग्रामदेवतांच्या पालख्यांच्या भेटीचा डोळ्यांचे पारणे फेडणारा अनोखा सोहळा हजारो भाविकांच्या उपस्थितीत रंगला. हा भव्यदिव्य सोहळा म्हणजेच दोन बहिणींच्या भेटीचा शिमगोत्सव पाहण्यासाठी हजारो भाविकांनी गर्दी केली होती. यावेळी मोठी जत्राही भरली होती.
शिवणे-करंबेळे येथील सीमेवर देवरुख- संगमेश्वर मार्गावर पालख्यांची आगळीवेगळी भेट पाहण्यासाठी हजारो भक्तगण उपस्थित राहतात. ही पालख्यांची भेट म्हणजे तालुक्यातीलच नाही तर जिल्ह्यातील भक्तगणांसाठी एक पर्वणी असते. आजूबाजूच्या गावातील शिमगोत्सव संपन्न झालेले असल्याने करंबेळे व शिवने गावच्या सीमेवर होणारी पालख्यांची भेट पाहण्यासाठी मोठी गर्दी उसळते. शिवणे गावच्या पालखीतील ग्रामदेवता रवळनाथ, नवलाई, व पावणाई असून करंबेळे गावच्या पालखीत ग्रामदैवत गांगोबा, देवी निनावी व वाघजाई असे आहे.
शनिवारी दुपारी तीन वाजण्याच्या सुमारास दोन्ही गावातील पालखी वाजत गाजत जल्लोषात सीमेवर आणण्यात आल्या. त्यानंतर या पालख्या भेटीपूर्वी नाचविण्यात येतात. यावेळी दोन्ही पालख्यांची भेट घडवून आणताना भक्तगण आपल्या खांद्यावर भक्तांना उभे करून त्यांच्या खांद्यावर दोन्ही पालख्या देतात व ही अनोखी भेट घडवून आणली जाते. या वर्षी ही भेट दुपारी ३.४५ वाजता घडली. या भेटीमध्ये दोन्ही पालख्यांमधील ओटींची अदलाबदल होते. हे या पालखी भेटीचे वैशिष्ट्य आहे. भेटी दरम्यान पालखी जड येतात असे सांगितले जाते. करंबेळे-शिवने पालख्या भेटींची ही परंपरा साडेतीनशे वर्षांपूर्वी पासूनची असल्याचे मानकरी सांगतात तसेच पूर्वी करंबेळे आणि शिवने हे दोन गाव एक होते राजर्षी शाहू महाराजांच्या कालखंडात हे दोन गाव वेगळे झाल्यापासून त्या गावातील देवींची म्हणजेच बहिणींची भेट घडविण्याची प्रथा असल्याचे सांगितले जाते.
या उत्सवादरम्यान मार्गाच्या दुतर्फा व्यापाऱ्यांनी दुकाने थाटली होती. सुमारे एक दीड किलोमीटर लांब एवढी मोठी यात्रा भरली होती. आबाल वृद्धांनी या पालखी भेट सोहळ्याचा आनंद लुटला. दरम्यान सोहळ्यामध्ये कोणताही अनुचित प्रकार घडू नये , मार्गावर वाहतुकीमध्ये कोणताही अडथळा होऊ नये यासाठी देवरुख व संगमेश्वर पोलिसांनी चोख पोलिस निरिक्षक अमित यादव यांच्या मार्गदर्शनाखाली बंदोबस्त तैनात होता.
