रत्नागिरी/जमीर खलफे:-आस्था 2025 च्या “सुपर मॉम” सौ.अनिता आत्माराम नारकर या गिरणी कामगाराच्या सामान्य कुटुंबात जन्मलेल्या, त्यांचे शिक्षण मुंबई येथे झाले. महानगर पालिका मुंबई येथे त्यांनी 1978 ते 2014 कालावधीत सेवा बजावली. त्यांना 2 अपत्य आहेत त्यातील ‘आरती’ हि बौद्धिक अक्षम प्रकारातील दिव्यांग असून ती सध्या 46 वर्षाची आहे. घरातील कामे ती उत्तमरित्या आवडीने करते. तिने मॅरेथॉन खेळामध्ये भारताचे प्रतिनिधित्व केले आहे. समाज सेवेची आवड व आपल्या मुलीचे अपंगत्व यामुळे सौ. नारकर यांनी सेवानिवृत्त झाल्यानंतर 2018 साली चिपळूण तालुक्यातील पेढे येथे ‘आरती निराधार सेवा फाउंडेशन’ या संस्थेची स्थापना केली व आता मालघर येथे देखील संस्थेच्या या कामाची सुरवात झाली आहे.
गेल्या सहा ते सात वर्षात संस्थेने 47 वृद्ध, दिव्यांग, निराधार व पीडित महिलांना आधार दिला आहे. अशा या आपल्या मुलीसह अनेक दिव्यांग व वृद्धांचे मातृत्व स्वीकारणाऱ्या सौ. अनिता आत्माराम नारकर यांना आस्था सोशल फाउंडेशन, रत्नागिरी चा “सुपर मॉम” पुरस्कार सौ. सम्राज्ञी संजय चाळके यांच्या हस्ते प्रदान करण्यात आला. या पुरस्काराचे स्वरूप शाल-श्रीफळ, सन्मान चिन्ह व रक्कम रुपये 5,000/- चा धनादेश असे आहे. या प्रसंगी आस्था च्या सुरेखा पाथरे यांनी सौ. अनिता नारकर यांची मुलाखत घेत त्यांच्या कार्याचा आढावा घेतला.कार्यक्रमाला सौ. अनिता नारकर, श्री. आत्माराम नारकर, आरती नारकर, श्रीम. अनघा जैतपाळ, आस्था चे पालक, कार्यकर्ते उपस्थित होते.
