दापोली:- शहराजवळील वळणे मिनी एमआयडीसीतील एका काजू फॅक्ट्रीत रविवारी दुपारी ११.३० चे सुमारास लिफ्टचा हुक तुटून लिफ्ट एका महिला कर्मचा-याच्या अंगावर पडून या महिलेचा मृत्यू झाल्याची घटना घडली आहे. याबाबत दापोली पोलिसांनी दिलेल्या माहितीनुसार वळणे एमआयडीसी येथील एका काजू फॅक्टरीत प्रविणी प्रभाकर कासेकर या रविवारी दुपारी 11.35 चे सुमारास लिफ्टच्या खाली पडलेल्या काजूच्या बिया झाडूने जमा करत असताना अचानक लिफ्टचा हुक तुटून ही लिफ्ट कासेकर यांच्या अंगावर पडली.
त्यात प्रविणी कासेकर या जखमी झाल्या त्यांना उपचारासाठी दापोलीच्या उपजिल्हा रुग्णालय येथे आणले असता तेथील वैद्यकीय अधिकाऱ्यांनी त्यांना तपासून मृत घोषित केले, या घटनेची दापोली पोलीस ठाण्यात आकस्मिक मृत्यूची नोंद करण्यात आली असून अधिक तपास उपनिरीक्षक अमोल गंगधर करीत आहेत.
