एकाला अटक, तिघांचा शोध सुरू
गुहागर:-तालुक्यातील भातगाव येथील शासकीय वाळू डेपोवरील तीन कामगारांना ते झोपेत असताना त्यांच्या खोलीमध्ये प्रवेश करून चौघांनी मारहाण केल्याची घटना गुरुवारी घडली. या प्रकरणी गुहागर पोलिसांनी विराज विजय कदम (32, भातगाव, तिसंग) याला शनिवारी अटक करण्यात आली असून पसार झालेल्या तिघांचा शोध सुरू आहे.
वाळूच्या व्यवहारातील रक्कमेवरून वाद झाल्याचे प्राथमिक तपासात पुढे आले आहे. भातगाव तिसंग येथील शासकीय वाळू डेपोवरील क्रेन ऑपरेटर मोहन गणपत महतो (43), निलकंठ महतो, धनु महतो हे तिघे कामगार असून 19 फेब्रुवारी 2025 रोजी रात्री 8 च्या सुमारास भातगाव तिसंग येथील खोलीवर जेवण करून झोपले होते. 20 फेब्रुवारी रोजी रात्री 1 च्या सुमारास या तिघांना चौघांनी येऊन दांडक्याने मारहाण करत काळोखात पसार झाले. या तीनही कामगारांवर जिल्हा रुग्णालयात उपचार सुरू आहेत. या प्रकरणी गुहागर पोलीस ठाण्यात त्या चार अज्ञात आरोपांविरोधात गुन्हा दाखल करण्यात आला आहे. तर आरोपींपैकी विराज विजय कदम, (32, रा. भातगाव, तिसंग) यांना 22 फेब्रुवारी रोजी अटक करण्यात आली. त्याला न्यायालयात हजर केले असता 24 फेब्रुवारीपर्यंत पोलीस कोठडी सुनावण्यात आली. अधिक तपास पोलीस हवालदार किशोर साळवी करत आहेत.
