चिपळूण : मुंबई गोवा राष्ट्रीय महामार्गावरील बहादूरशेखनाका येथे उड्डाणपुलाच्या कामाला आता गती येऊ लागली आहे. जुने पिअर तोडल्यानंतर आता नवीन पिअर कॅप उभारण्याच्या कामाला वेग आला आहे.
उर्वरित काम पूर्ण करण्यासाठी तीन टीम काम करत आहेत. तसेच पुलाच्या एका बाजूने गर्डर चढविण्याचे काम गुरुवारपासून सुरु केले आहे. दोन क्रेनच्या सहाय्याने हे काम केले जात असल्याची माहिती राष्ट्रीय महामार्ग विभागाचे कार्यकारी अभियंता आर. बी. कुलकर्णी यांनी दिली.
मुंबई-गोवा राष्ट्रीय महामार्गाच्या पेढे-परशुराम ते खेरशेत या 34 किलोमीटर दरम्यान चौपदरीकरणातील चिपळूण टप्प्यात बहादूरशेख नाका ते प्रांत कार्यालयापर्यंत उड्डाणपूल उभारण्यात येत आहे. साधारणपणे या पुलाची लांबी 1840 मीटर, तर रुंदी 45 मीटर इतकी असून हा पूल कोकणातील महामार्गावरील सर्वाधिक लांबीचा ठरला आहे.
या पुलासाठी एकूण 46 पिलर उभारण्यात आले असून बहादूरशेखनाका येथून या पुलाचे काम पावसाळ्यात सुरू केले. मात्र, 16 ऑक्टोबर 2023 रोजी या पुलाचा काही भाग कोसळला. पूल कोसळल्यानंतर त्याच्या उभारणीवर टीका-टिपणी सुरू झाली.
महामार्गावर पूल कोसळल्यानंतर उभारणीतील काही त्रुटी प्राथमिकद़ृष्ट्या समोर आल्यानंतर त्यावर मंथन सुरू झाले. केंद्रातून तज्ज्ञ समिती पाठवून पुलाची तपासणी करण्यात आली होती. राष्ट्रीय महामार्ग विभागाने या पुलाच्या डिझाईनमध्ये बदल सुचवले होते. यामध्ये सध्या पूल उभारणीत 40 मीटरचे गाळे ठेवण्यात आले होते. त्यामधील अंतर कमी करुन ते 20 मीटरवर ठेवले आहेत. त्यासाठी तेथे अतिरिक्त पिअर उभारण्यात आले आहेत.
दरम्यान, नवीन रचनेनुसार या पुलाचे काम सुरु केले आहे. यामध्ये पिअर कॅप उभारण्याचे काम वेगाने सुरु झाले असून एकूण 95 पिअर कॅपपैकी 13 पिअर कॅपचे काम पूर्ण केले आहे. त्यासाठी तीन टीम काम करत आहेत. त्यानंतर आता पिअर कॅपपैकी उभारण्यासाठी दोन क्रेन मागविण्यात आले आहेत. बुधवारी या कामाची चाचणी घेण्यात आली. गुरुवारी पुलाच्या एका बाजूने गर्डर चढविण्याचे काम सुरु करण्यात आले.
