एका कामगारास किरकोळ त्रास, कामगारांमध्ये भीतीचे वातावरण कायम
खेड:- लोटे औद्योगिक वसाहतीतील लक्ष्मी ऑरगॅनिक इंडस्ट्रीज कंपनीत शनिवारी सायंकाळी 5 वाजण्याच्या सुमारास झालेल्या वायुगळतीने एकच खळबळ उडाली. वायुगळतीचा एका कामगारास किरकोळ त्रास झाल्याचे समजते. कंपनीतील सर्व कामगारांना तातडीने बाहेर काढण्यात आल्याने अनर्थ टळला. वायुगळती नंतर नजीकचे ग्रामस्थ देखील आक्रमक झाल्याने जादा पोलिसांची कुमक तैनात करण्यात आल्याच्या समजते. सायंकाळी उशिरा वायुगळती नियंत्रणात आणण्यात यश आल्याचे सांगण्यात आले.
कंपनीत वायुगळती झाल्याची बाब निदर्शनास येताच कंपनी व्यवस्थापनाची त्रेधातीरपिटच उडाली. कंपनीतील सर्व कामगारांना तातडीने बाहेर काढण्यात आले.
वायुगळती आटोक्यात आणण्यासाठी लोटे एमआयडीसीतील अग्निशमन यंत्रणा व तंत्रज्ञ तातडीने घटनास्थळी पोहचले. सहाय्यक पोलीस निरीक्षक संजय पाटील यांनीही पोलीस कर्मचाऱ्यांसह घटनास्थळ गाठले.
या कंपनीतील स्टोअर रिसेल लिकेज झाल्याने वायु गळतीचा प्रकार घडल्याचे स्पष्ट करण्यात आले. वायु गळतीने कोणत्याही कामगाराला धोका पोहचला नसल्याचेही सांगण्यात आले. या कंपनीत झालेल्या वायूगळतीनंतर नजीकच्या कंपनीतील कामगारांमध्ये देखील भीतीचे वातावरण पसरले होते. शिवाय नजीकच्या ग्रामस्थांनी घटनास्थळी पोहचून कंपनी व्यवस्थापन अधिकायांना धारेवर झाल्याचे समजते. सायंकाळी उशिरापर्यंत याबाबत अधिक तपशील उपलब्ध होऊ शकला नाही. याबाबत अधिक तपास पोलीस निरीक्षक नितीन भोयर यांच्या मार्गदर्शनाखाली सहायक पोलीस निरीक्षक संजय पाटील करत आहेत.
