लांजा:-राजापूर बसस्थानकासमोर राज्य उत्पादन शुल्क विभाग मुंबईच्या भरारी पथकाने केलेल्या कारवाईत आयशर टेम्पो मधून अवैधरित्या नेण्यात येत असलेला लाखो रुपयांचा गोवा बनावटीचा मद्यसाठा पकडण्यात आला. यामध्ये मद्यसाठा, मोबाईल आणि वाहतूकीसाठी वापरलेला आयशर टेम्पो असा एकूण १ कोटी १४ लाख ९ हजार रुपयांचा मुद्देमाल जप्त करण्यात आला. गुरुवार २० फेब्रुवारी रोजी सकाळी ९ वाजण्याच्या सुमारास ही कारवाई करण्यात आली.
कारवाई संदर्भात मिळालेल्या माहितीनुसार, गोवा येथून आयशर टेम्पो मधून गोवा बनावटीच्या मद्याची वाहतूक होत असल्याची खबर राज्य उत्पादन शुल्क विभाग मुंबईच्या भरारी पथकाला मिळाली होती. त्यानुसार भरारी पथकाने गुरुवारी सकाळ पासूनच मुंबई-गोवा महामार्गावर राजापूर एसटी बसस्थानकासमोर सापळा रचला होता. अशातच सकाळी नऊ वाजण्याच्या सुमारास गोव्याहून मुंबईच्या दिशेने जाणारा आयशर टेम्पो (क्रमांक जीजे.१६.एयु.६८३८) हा थांबवण्यात आला. त्यानंतर या टेम्पोची तपासणी केली असता टेम्पोच्या पाठीमागील हौद्यामध्ये ठेवलेला गोवा बनावटीचा विदेशी मद्याचा साठा आढळून आला. यामध्ये एव्हरग्रीन रिझर्व व्हिस्की ७५० मिलीच्या ४८०० बॉटल, रॉयल ब्लॅक ॲपल व्होडका ७५० मिलीच्या ४८०० बॉटल तसेच किंगफिशर स्ट्रॉंग व्हिस्की ५०० मिलीचे ५० बॉक्स इत्यादी विदेशी मद्याची किंमत ९२ लाख ४ हजार रुपये इतकी आहे. या मद्याची वाहतूक करणाऱ्या आयशर टेम्पोची किंमत २२ लाख रुपये तसेच टेम्पो चालकाकडे असणारा रेडमी कंपनीचा मोबाईल अंदाजे ५ हजार रुपये किंमतीचा असा एकूण १ कोटी १४ लाख ९ हजार रुपयांचा मुद्देमाल राज्य उत्पादन शुल्क विभाग मुंबईच्या भरारी पथकाने जप्त केला.
सदर आयशर टेम्पो चालकाचे नाव साहील कमरु खान (वय २४, रा.हरियाणा) असे असून विनापरवाना विदेशी गोवा बनावटीच्या मद्याची वाहतूक केल्याप्रकरणी त्याच्याविरुद्ध महाराष्ट्र दारूबंदी कायदा १९४९ चे कलम ६५ अ व इ, ८१, ८३ या प्रमाणे गुन्हा दाखल करण्यात आला आहे. ही कारवाई महाराष्ट्र राज्य उत्पादन शुल्क विभाग भरारी पथक मुंबई यांच्यावतीने करण्यात आली आहे. सदर करवाईवेळी राज्य उत्पादन शुल्क विभाग भरारी पथक मुंबईचे दुय्यम निरीक्षक सतीश इंगळे आदींसह त्यांचे सहकारी उपस्थित होते.
