चिपळूण:-चिपळूण-खेड एसटीवरील वाहकाला दोन तरुणांनी शिवीगाळसह मारहाण केल्याची घटना रविवारी दुपारी 3 वाजण्याच्या सुमारास मुंबई-गोवा महामार्गावरील वालोपे-कळंबस्ते मार्गावर घडली.
चिपळूण-खेड ही बस प्रवाशांना घेऊन चिपळूणहून खेडच्या दिशेने जात होती. या बसवर वाहक म्हणून रतन संभाजी दहीफळे हे कार्यरत होते. ही बस मुंबई-गोवा महामार्गावरील वालोपे-कळंबस्ते सर्व्हिस मार्गाने पुढे नियोजित प्रवासाला जात असताना दोन तरुणांनी वाहक रतन दहीफळे यांना एसटी सर्व्हिस रोडवर का आणली, अशी विचारणा केली. यातून वाद निर्माण झाला व त्या तरुणांनी दहीफळे यांना शिवीगाळसह मारहाण केली. यानंतर प्रवाशांनी भरलेली ही एसटी पुन्हा चिपळूण आगारात आणण्यात आली. झालेल्या प्रकाराची वरिष्ठांना माहिती दिल्यानंतर फिर्याद देण्यासाठी वाहक दहिफळे हे एसटीसह चिपळूण पोलीस ठाण्यात आले. तिथे गुन्हा दाखल करण्याची प्रक्रिया सुरू होती.
