जानेवारी महिन्यात तब्बल ३ हजार ४८७ खातेदारांनी ठेव योजनेत घेतला सहभाग
चिपळूण (प्रतिनिधी):- चिपळूण नागरी सहकारी पतसंस्थेच्या मासिक ठेव योजनेत जानेवारी महिन्यात तब्बल ३ हजार ४८७ खातेदारांनी सहभाग घेतल्याने ६४ लाख ७५१ रुपयांची मासिक ठेव जमा झाली आहे, अशी माहिती संस्थेचे संस्थापक अध्यक्ष सुभाषराव चव्हाण व मुख्य कार्यकारी अधिकारी सौ. स्वप्ना यादव यांनी दिली.
चिपळूण नागरी सहकारी पतसंस्थेची संस्थापक अध्यक्ष सुभाषराव चव्हाण यांच्या नेतृत्वाखाली यशस्वी वाटचाल सुरू आहे. आर्थिक व्यवसायिकता सांभाळीत असतानाच गरजू, सुशिक्षित बेरोजगार तरुणांना व्यवसायासाठी सुलभ पद्धतीने कर्ज पुरवठा केला जातो. इतकेच नव्हे तर ठेवींवर देखील योग्य व्याज दर दिला जात आहे. तर सामाजिक बांधिलकी देखील तितकीच जपली जात आहे.
चिपळूण नागरीच्या ५० शाखांच्या माध्यमातून आर्थिक व्यावसायिकता संभाळताना- पारदर्शक कारभार पाहताना दि. ३१ डिसेंबर २०२४ अखेर भाग भांडवल ७५ कोटी ७ लाख (एवढे मोठी भागभांडवल असणारी महाराष्ट्र तील संस्था), एकूण व्यवसाय २१०० कोटी आहे.
तसेच चिपळूण नागरीने सभासदांना बचतीची सवय लागावी यासाठी अनेक योजना सुरू केले आहेत. यामध्ये धनसिद्धी ठेव, श्री स्वामी समर्थ ठेव, सिद्धी ठेव, राष्ट्र अमृत महोत्सव ठेव, संकल्प ठेव, श्रावण मास ठेव, समृद्धी ठेव, गणेश ठेव, उत्कर्ष व धनसंचय ठेव या ठेव योजनेबरोबरच सुयश, अल्पमुदत, आवर्त, बचत, स्वावलंबी बचत, धनवर्धनी, दाम दुप्पट, दाम तिप्पट या ठेव योजनांचा समावेश आहे.
या योजनेत हजारो सभासद सहभागी झाले आहेत. यामध्ये ३५ हजार सभासदांनी संस्थेच्या मासिक ठेव योजनेत सहभाग घेतल्याने महिन्याला तब्बल साडेपाच कोटी जमा होत आहेत. तर जानेवारी महिन्यात या ठेव योजनांमध्ये तब्बल ३ हजार ४८७ खातेदारांनी सहभाग घेतल्याने ६४ लाख ७५१ रुपये जमा झाले आहेत. एकंदरीत चिपळूण नागरीच्या ठेव योजनेला सर्वसामान्यांचा उत्तम प्रतिसाद मिळत आहे. याचबरोबर संस्थेच्या माध्यमातून गरजूंना सुलभ पद्धतीने तात्काळ कर्ज पुरवठा केला जात आहे. याचबरोबर शेतीपूरक दुग्ध व्यवसायाबरोबरच अन्य व्यवसायांना देखील कर्ज पुरवठा केला जात असल्याने येथील शेतकरी व तरुण वर्ग स्वावलंबी होताना दिसत आहे. भविष्यात देखील मासिक ठेव योजनेबरोबरच गरजू व व्यावसायिकांना सुलभ पद्धतीने कर्ज पुरवठा करण्यावर भर राहील, अशी माहिती यावेळी संस्थेचे संस्थापक अध्यक्ष सुभाषराव चव्हाण व मुख्य कार्यकारी अधिकारी सौ. स्वप्ना यादव यांनी दिली.
