रत्नागिरी:-साखरपा येथे कारने डंपरला दिलेल्या धडकेत 3 जखमी झाल्याची घटना आज बुधवारी पहाटेच्या सुमारास घडली. जखमींना तातडीने जिल्हा शासकीय रुग्णालय रत्नागिरी येथे दाखल करण्यात आले आहे. वैजयंती शशिकांत पेडणेकर (50), शोभा श्रीधर पेडणेकर (65), व विनोद शशिकांत पेडणेकर (28, ऱा तिघेही डोंबिवली, ठाणे) अशी जखमींची नावे आहेत.
विनोद पेडणेकर हे मंगळवारी रात्री साडेनऊच्या सुमारास मोटार घेऊन मुंबईहून आपल्या गावी खारेपाटण येथे जात होते. सकाळी ते साखरपा देवरुख ते वाटूळ या मार्गावरुन जात असताना मेढे साखरपा येथील रस्त्यावर पुढे जाणारा डंपर अचानक थांबला. यावेळी विनोद पेडणेकर यांनी मोटारीला ब्रेक केला, मात्र मोटार घसरुन डंपरला मागून धडक दिली. यात पेडणेकर कुटुंबियातील तिघेजण जखमी झाले. उपचारासाठी त्यांना प्राथमिक आरोग्य केंद्र साखरपा येथे दाखल केले होते. अधिक उपचारासाठी जिल्हा रुग्णालयात दाखल करण्यात आले आहे.
