आत्महत्येस प्रवृत्त केल्याचे कारण
गुहागर:- गुहागर तालुक्यातील एका हॉटेलमध्ये जेवण विभागात सुपरवायझर म्हणून कामाला असलेल्या गितेश मुरटे यानी गळफास लावून केलेल्या आत्महत्या केल्याप्रकरणी अधिकाऱ्यासमवेत दोन कामगार अशा तिघांवर गुहागर पोलीस ठाण्यात गुन्हा दाखल करण्यात आला आहे. 11 नोव्हेंबर 2024 रोजी सदर घटना घडली होती.
गुन्हा दाखल झालेल्यांमध्ये अधिकारी कुमार स्वामी बटुला, (53, आरजीपीपीएल कॉलनी), राहुल रघुनाथ रहाटे, (34, जानवळे), साहील संतोष महाडिक, (25, पालपेणे) अशी गुन्हा दाखल झालेल्यांची नावे आहेत.
आत्महत्या करणारा गितेश विलास मुरटे, (31, मूळ अंधेरी इस्ट, मुंबई)़ नोकरीनिमित्त गुहागर बाग येथे भाडयाच्या घरामध्ये रहात होता. 11 नोव्हेंबर 2024 रोजी त्याने भाडयाच्या खोलीमध्ये गळफास घेऊन आत्महत्या केली होती. याप्रकरणी त्याचा भाऊ श्रीकांत विलास मुरटे याने गुहागर पोलीस ठाण्यात फिर्याद दाखल केली होती. त्यानुसार या घटनेचा पोलीस उपनिरीक्षक सुजित सोनावणे अधिक तपास करत होते.
या तपासामधून मयत गितेश मुरटे याला आत्महत्या करण्यास भाग पाडले म्हणून वरील तिघांवर गुन्हा दाखल करण्यात आला आहे. त्यांनी मृत गितेश मुरटे याला क्षुल्लक कारणावरून तसेच कामाचा दबाव टाकून, वारंवार उद्धटपणे बोलून मानसिक त्रास देवून आत्महत्या करण्यास प्रवृत्त केले, असे नमूद केले आहे.
