लांजा:-कारने मोटरसायकलला पाठीमागून धडक दिल्याने मोटरसायकलस्वार वायरमन जखमी झाल्याची घटना मुंबई-गोवा महामार्गावर वाकेड सावंतवाडी येथे शनिवारी दुपारी 3.45 वाजण्याच्या सुमारास घडली.
याबाबत पोलिसांनी दिलेल्या माहितीनुसार, या घटनेत जखमी झालेले प्रमोद हरिश्चंद्र गुरव (वय 42, रा.वाकेड गुरववाडी, ता.लांजा) हे महावितरणमध्ये वायरमन म्हणून नोकरीला आहेत. प्रमोद गुरव हे शनिवारी 8 फेब्रुवारी रोजी आपल्या ताब्यातील होंडा मोटरसायकल (क्रमांक एमएच.05.डीव्ही.9668) घेऊन वाकेड गावकरवाडी येथून इलेक्ट्रिक वायर दुरुस्त करून मोटरसायकलने बोरथडे फाटा येथील डीपीवर इलेक्ट्रिक सप्लाय चालू करण्यासाठी जात असताना वाकेड सावंतवाडी येथे दुपारी 3.45 वाजता आले असता पाठीमागून आलेल्या आणि मुंबई येथून गोव्याच्या दिशेने जाणाऱ्या कारने (क्रमांक एमएच.03.बीडब्ल्यू.2259) ने मोटरसायकलला पाठीमागून धडक दिली. ही कार दिलीप गणपत प्रभू ( वय 68, रा.आशिष नगर, शंकरा कॉलनी, पी.एल.लोखंडे मार्ग गोवंडी, मुंबई) हे चालवत होते.
या अपघातात मोटर सायकलस्वार प्रमोद गुरव हे मोटरसायकलवरून खाली पडून त्यांच्या डोक्याला, खांद्याला तसेच दोन्ही पायांना दुखापत होऊन ते जखमी झाले. याबाबतची खबर महेश मनोहर गुरव (वाकेड गुरववाडी) यांनी लांजा पोलिसांना दिली. या प्रकरणी लांजा पोलीस ठाण्यात अपघाताची नोंद करण्यात आली असून अधिक तपास सहाय्यक पोलीस फौजदार भालचंद्र रेवणे करत आहेत.
