18 खेळांच्या स्पर्धेसाठी क्रीडासंकुलात जय्यत तयारी सुरू
चिपळूण:-श्री विठ्ठलराव जोशी चॅरिटीज ट्रस्ट आयोजित शिवजयंतीनिमित्त होणाऱ्या 11व्या डेरवण युथ गेम्सचे 10 ते 16 मार्चदरम्यान आयोजन करण्यात आले आहे. यासाठी राज्यभरातून 8 हजाराहून अधिक खेळाडू सहभागी होणार आहेत. त्यासाठी डेरवण क्रीडासंकुलात 18 खेळांच्या स्पर्धांसाठी जय्यत तयारी सुरू झाली आहे.
या स्पर्धेत ऍथलेटिक्स, जिम्नॅस्टिक, बॅडमिंटन, टेबल टेनिस, जलतरण, तिरंदाजी, नेमबाजी, बुद्धीबळ, कॅरम, देशी खेळांना प्रोत्साहन देण्यासाठी कबड्डी, खो-खो, लंगडी, मल्लखांब, योगा या वैयक्तिक खेळासह फुटबॉल, व्हॉलीबॉल, बास्केटबॉल या खेळांचा समावेश आहे. त्याचबरोबर ऑलिम्पिकमध्ये समाविष्ट करण्यात आलेल्या वॉल क्लाइम्बिंग या साहसी खेळाचीही स्पर्धा पाहण्यास मिळणार आहे. भारतीय खेळ व ऑलिम्पिक खेळांचा संगम असणाऱ्या या स्पर्धेत राज्यभरातील 8 हजारापेक्षा अधिक खेळाडू सहभागी होणार आहेत. यंदाही विजेत्यांना पदके, चषक आणि रोख पारितोषिके देऊन गौरवण्यात येणार आहे. 1,200 पदके, 115 करंडक या स्पर्धेत खेळाडूंना बक्षीस रूपाने देण्यात येणार आहे.
अनेक राष्ट्रीय खेळाडूंनी या स्पर्धेत भाग घेण्याचे निश्चित केले आहे. विविध क्रीडा प्रकारात राज्यातील खेळाडूंचा चित्तथरारक खेळ या स्पर्धेनिमित्त पाहण्याची पर्वणी प्रेक्षकांना मिळणार आहे. या स्पर्धेचे उद्घाटन 10 मार्च रोजी द्रोणाचार्य पुरस्कार प्राप्त, ऑलिम्पिक पदक विजेता स्वप्नील कुसाळे यांच्या प्रशिक्षिका दिपाली देशपांडे यांच्या प्रमुख उपस्थितीमध्ये पार पडणार आहे. या स्पर्धेत 8 ते 18 वर्षाखालील खेळाडू सहभागी होणार आहेत. 8 मार्चपर्यंत नोंदणी सुरु राहणार आहे. नोंदणीसाठी 9822639306 या मोबाईल क्रमांकावर संपर्क साधावा, असे आवाहन करण्यात आले आहे.
