Union Budget 2025 Update News: अर्थसंकल्प सादर होण्याच्या काही तास आधी देशातील कोट्यवधी लोकांना मोठा दिलासा मिळाला आहे. देशातील सामान्य नागरिकांना गॅस सिलेंडरच्या किमतीत दिलासा देण्यात आला आहे.
आयओसीएलच्या आकडेवारीनुसार, सलग दुसऱ्या महिन्यात गॅस सिलिंडरच्या किमती कमी करण्यात आल्या आहेत.
ही कपात व्यावसायिक गॅस सिलिंडरच्या किमतीत करण्यात आली आहे. जर गेल्या दोन महिन्यांतील कपात पाहिली तर व्यावसायिक गॅस सिलिंडरची किंमत २० रुपयांपेक्षा जास्त कमी झाली आहे. दुसरीकडे, मार्च २०२४ पासून घरगुती गॅस सिलिंडरच्या किमतीत कोणताही बदल झालेला नाही. देशात व्यावसायिक आणि घरगुती गॅस सिलिंडरच्या किमती काय आहेत ते जाणून घेऊया.
व्यावसायिक गॅस सिलिंडर स्वस्त
सलग दुसऱ्या महिन्यात व्यावसायिक गॅस सिलिंडरच्या किमतीत घट झाली आहे. देशाची राजधानी दिल्लीत घरगुती गॅस सिलेंडरची किंमत ७ रुपयांनी कमी झाली असून आता किंमत १,७९७ रुपये असणार आहे. कोलकातामध्ये किमान ४ रुपयांची कपात करण्यात आली आहे आणि किंमत १९०७ रुपये झाली आहे. तर मुंबई आणि चेन्नईमध्ये व्यावसायिक गॅस सिलिंडरच्या किमतीत ६.५ रुपयांची कपात करण्यात आली आहे.
त्यानंतर दोन्ही महानगरांमध्ये व्यावसायिक गॅस सिलिंडरच्या किमती अनुक्रमे १७४९.५० रुपये आणि १९५९.५० रुपये झाल्या आहेत. गेल्या दोन महिन्यांबद्दल बोलायचे झाले तर, देशाची राजधानी दिल्ली आणि मुंबईत व्यावसायिक गॅस सिलिंडर २१.५ रुपयांनी स्वस्त झाला आहे. तर कोलकातामध्ये २० रुपयांची आणि चेन्नईमध्ये २१ रुपयांची घसरण दिसून आली आहे.
घरगुती गॅस सिलिंडरच्या किमतीत बदल नाही
दुसरीकडे, सलग ११ व्या महिन्यात घरगुती गॅस सिलिंडरच्या किमतीत कोणताही बदल झालेला नाही. घरगुती गॅस सिलिंडरच्या किमतीत शेवटचा बदल मार्च २०२४ मध्ये करण्यात आला होता. सरकारच्या घोषणेनंतर जेव्हा आयओसीएलने घरगुती गॅस सिलिंडरच्या किमतीत १०० रुपयांची कपात केली होती. होळी आणि लोकसभा निवडणुकीपूर्वी सरकारने सर्वसामान्यांना दिलासा देण्याचा प्रयत्न केला होता. तेव्हापासून घरगुती गॅस सिलिंडरच्या किमतीत कोणताही बदल झालेला नाही. तेव्हापासून, दिल्लीत घरगुती गॅस सिलिंडरची किंमत ८०३ रुपये आहे. दुसरीकडे, कोलकातामध्ये किंमत ८२९ रुपये, मुंबईत ८०२.५० रुपये आणि चेन्नईमध्ये ८१८.५० रुपये आहे.
