खेड:-महाराष्ट्रातील प्राचीन कदम घराण्याचे सातवे राज्यस्तरीय कुलसंमेलन यावर्षी रत्नागिरी जिल्ह्यातील जामगे येथे शिवसेना नेते व माजी पर्यावरण मंत्री रामदासभाई कदम यांच्या प्रमुख उपस्थितीत ८ आणि ९ फेब्रुवारी रोजी होणार आहे.
प्राचीन सत्ताधीश कदंब राजवंशाचा इतिहास लाभलेल्या कदम कुटुंबीयांना स्वतःचे कुलाचार, परंपरा, वारसा याबद्दल माहिती व्हावी, नोकरी-व्यवसायात एकमेकांना सहकार्य मिळावे, तसेच घराण्यातील नामवंतांचा सन्मान करून त्यांना प्रोत्साहन द्यावे, ही उद्दिष्टे डोळ्यांसमोर ठेवून क्षत्रिय मराठा कदम परिवार संस्थेने आजतागायत तुळजापूर, गिरवी (फलटण), गढीताम्हाणे (सिंधुदुर्ग) , गलांडवाडी (दौंड) , धामदरी (नांदेड) आणि आंबेचिंचोली (पंढरपूर) येथे वार्षिक संमेलने घेतली. यावर्षीचे सातवे राज्यस्तरीय कुलसंमेलन खेडजवळच्या जामगे या गृहराज्यमंत्री योगेशदादा कदम यांच्या मूळ गावी ८ आणि ९ फेब्रुवारी रोजी होणार आहे. कुलसंमेलनासाठी महाराष्ट्रासह गोवा, मध्य प्रदेश, कर्नाटक, बडोदा या राज्यातूनही कदम बांधव उपस्थित राहणार आहेत.
नोकरी-व्यवसायानिमित्त अनेक गावांत, शहरांत वास्तव्यास असलेले कदम भाऊबंद कुलसंमेलनानिमित्त एकत्र येणार असून घराण्याचा जाज्ज्वल्य वारसा जपण्याचा मानस मेळाव्यातून केला जाणार आहे. कुलसंमेलनाच्या पहिल्या दिवशी , ८ फेब्रुवारी रोजी संध्याकाळी सात वाजता कुलदेवता श्रीतुळजाभवानीच्या जागर गोंधळाने कार्यक्रमाची सुरुवात होईल, मागील कुलसंमेलनाच्या छायाचित्रांचा स्लाइड शो दाखवला जाणार आहे.
दुसऱ्या दिवशी, ९ फेब्रुवारी रोजी सकाळी जामगे गावचे ग्रामदैवत श्रीकोटेश्वरी मानाई देवीचे दर्शन आणि पूजन झाल्यानंतर कदंब राजवंशाचे ध्वजारोहण गृहराज्यमंत्री योगेशदादा कदम यांच्या हस्ते होणार आहे. त्यानंतर बदलापूर येथील सुप्रसिद्ध शस्त्रसंग्राहक सुनील कदम यांच्या शिवकालीन शस्त्रप्रदर्शनाचे उद्घाटन होईल.
कदम कुलसंमेलनाचे उदघाटन शिवसेना नेते, माजी पर्यावरण मंत्री रामदासभाई कदम यांच्या हस्ते झाल्यानंतर प्रा. डॉ. सतीश कदम, उद्योजक मनोज कदम आणि चिपळूण येथील पराग कदम (अडरे) यांची कदम घराण्याचा इतिहास आणि सद्यःस्थितीतील तरूणांना मार्गदर्शनपर व्याख्याने होणार आहेत. गेल्या वर्षभरात उल्लेखनीय कार्य केलेल्या कदम बंधूभगिनींचा सन्मान करण्यात येणार आहे.
कुलसंमेलनास सांगलीचे खासदार विशाल पाटील (कदम), परभणी जिल्ह्याच्या पालकमंत्री मेघनाताई बोर्डीकर (कदम) , पलूस-कडेगावचे आमदार विश्वजित कदम, घाटकोपर पश्चिम मतदारसंघाचे आमदार राम कदम, हदगाव (नांदेड) येथील आमदार बाबूराव कदम-कोहळीकर उपस्थित राहणार आहेत. कुलसंमेलनाचे निमंत्रक खेड पंचायत समितीचे माजी सभापती चंद्रकांत गंगाराम कदम असून, या राज्यस्तरीय कुलसंमेलनास सर्व कदम बंधूंनी उपस्थित राहावे, असे आवाहन क्षत्रिय मराठा कदम परिवार राज्य अध्यक्ष अमरराजे कदम, सचिव रामजी कदम, सल्लागार माऊलीशेठ कदम पाटील, कार्यकारिणी सदस्य चंद्रशेखर कदम तसेच जामगे कदम परिवाराच्या वतीने करण्यात आले आहे.
