सांगली : मॉडेल स्कूलचा उपक्रम राज्यभर राबविण्याचा निर्णय शिक्षणमंत्री दादा भुसे यांनी घेतला आहे. या संदर्भात त्यांंनी सांगलीचे प्राथमिक शिक्षणाधिकारी मोहन गायकवाड यांच्याकडून माहिती घेतली. सांगलीच्या या पॅटर्नची राज्यभर चर्चा होत असल्याने मंत्री भुसे यांनीही शिक्षण खात्याचा कार्यभार स्वीकारताच सांगली पॅटर्न राज्यभर राबवण्याचा निर्णय घेतला. सांगलीत तत्कालीन पालकमंत्री जयंत पाटील यांनी मॉडेल स्कूल मोहीम सुरू केली. जिल्हा परिषदेचे तत्कालीन मुख्य कार्यकारी अधिकारी जितेंद्र डुडी यांच्यामार्फत जिल्हाभरात राबविली. सध्या जिल्ह्यातील सर्वच प्राथमिक शाळांचा कायापालट झाला आहे. भौतिक सुविधांसोबतच शैक्षणिक दर्जाही उंचावला आहे. या कामी लोकांचाही सहभाग घेतला आहे. मंत्री भुसे यांनी या उपक्रमाची माहिती घेतली. त्यानंतर गायकवाड यांना या उपक्रमाच्या सादरीकरणासाठी पाचारण केले. जिल्हा परिषदेच्या मुख्य कार्यकारी अधिकारी तृप्ती धोडमिसे यांच्या सूचनेनुसार गायकवाड यांनी भुसे यांना या अभियानाची संपूर्ण माहिती दिली.
काय आहे सांगलीचा मॉडेल स्कूल पॅटर्न?
मॉडेल स्कूल उपक्रमांतर्गत शाळांना सर्व भौतिक सुविधा देण्यात आल्या आहेत. पिण्याचे पाणी, स्वच्छतागृहे, हॅपिनेस प्रोग्राम, शैक्षणिक चित्रफिती, खेळातून शिक्षण, नव्या कोऱ्या सुसज्ज इमारती, प्रोजेक्टर, एलसीडी, संगीत साहित्य, ग्रंथालय, खेळण्याचे साहित्य आदी उपलब्ध केेले आहे. पुरेसा शिक्षकवर्गही दिला आहे. याचा अनुकूल परिणाम दिसला असून शैक्षणिक दर्जा उंचावला आहे. भुसे यांच्यासमोर सादरीकरण करताना समग्र शिक्षण अभियानाचे प्रभारी कार्यकारी अभियंता उमेश पाटील, विशेष शिक्षक राहुल राजे कुंभार आणि विषयतज्ज्ञ सुशांत माळी हेदेखील उपस्थित होते.
