रायगड:- रायगड जिल्ह्यातील खोपोली पोलीस ठाण्याच्या हद्दीमध्ये आज सकाळी दहा वर्षाच्या सुमारास उभ्या असलेल्या एका ट्रकवर पुण्याहून मुंबईकडे जाणाऱ्या ट्रकने जोरात धडक दिल्यामुळे झालेल्या अपघातात दोन वाहनातील एका वाहनाच्या चालकाचा जागीच मृत्यू झाला आहे. या अपघाताची नोंद खोपोली पोलीस ठाण्यात करण्यात आली आहे.
आज सकाळी दहा वाजण्याच्या सुमारास मुंबई पुणे द्रुतगती महामार्गावरील मुंबई लेन लगत असलेल्या पार्किंगमधे उभ्या असलेल्या ट्रक क्र. DD 03 P 9459 ला पुणे कडून मुंबईच्या दिशेने कॉईल वाहून नेणाऱ्या ट्रेलर क्रमांक HR39 E 5203 चा ब्रेक फेल झाल्यामुळे चालकाचे वाहनावरील नियंत्रण सुटले, यामुळे झालेल्या अपघातात ट्रेलरच्या केबिनचा चक्काचूर होऊन चालक पवन कुमार – २५ हा जागीच मरण पावला. ट्रेलर मधील कॉइल चालकाच्या अंगावर कोसळल्यामुळे चालकाचा अडकलेला मृतदेह काढण्यासाठी आय आर बी पेट्रोलींग यंत्रणेच्या क्रेनचा वापर करण्यात आला. अपघात स्थळी महामार्ग वाहतूक पोलीस यंत्रणा बोरघाट, येथील अधिकारी आणि कर्मचारी तातडीने दाखल झाले. एम एस आर डी सी च्या देवदूत यंत्रणेने मृतदेह बाहेर काढण्यात आल्यानंतर मृतदेह खोपोली नगरपालिका रुग्णालयात पुढील तांत्रिक प्रक्रियेसाठी नेण्यात आला. डेल्टा फोर्स, महाराष्ट्र सुरक्षा बल, अपघातग्रस्तांच्या मदतीसाठी सामाजिक संस्था यांनी देखील अपघातात मदत कार्य केले. खोपोली पोलीस स्टेशनचे हद्दीत हा अपघात घडला आहे.
