दापोली : तालुक्यातील म्हाळुंगे-माटवण फाट्यावर तीन दुचाकीच्या अपघातात एकजण ठार झाला. तर दोघेजण जखमी झाले. जखमींना दापोली उपजिल्हा रूग्णालयात उपचार करून घरी सोडण्यात आले.
दापोली पोलीस ठाण्याकडून मिळालेल्या माहितीनुसार, शनिवारी सायंकाळी 7.30 च्या सुमारास दापोली ते मंडणगड मार्गावर म्हाळुंगे-माटवण फाटा येथे झालेल्या अपघातात करंजाणी येथील दुचाकीस्वार सुयोग सुरेश सकपाळ (24) या मृत्यू झाला असून अथर्व अजय कालेकर(17, रा. मानखुर्द महाराष्ट्रनगर मुंबई, सध्या राहणार करंजाणी) व सनी सोपान जाधव (24, रा. महाड गांधारपाले) हे दोघेजण जखमी झाले. मृत सुयोग सकपाळ हा त्याच्या ताब्यातील दुचाकीवरून दापोली ते मंडणगडच्या दिशेने जात होता. याचदरम्यान दुचाकी एका वळण्याच्या ठिकाणी आली असता त्याने रस्त्याच्या विशिष्ट परिस्थितीकडे दुर्लक्ष करून गाडी वेगात व धोकादायक स्थितीत चालवून समोरून येणाऱ्या दुचाकी (क्र. एम. एच. 06 सी. एन. 4374) व दुसरी दुचाकी (क्र. एम. एच. 06 सी. जे 0620) यांना ठोकर देवून अपघात केला. यात सुयोग हा रस्त्यावर पडल्याने व डोक्याला दुखापत झाल्याने तो मृत झाला. त्याच्यावर स्वतःच्या दुखापतीस व नुकसानीस कारणीभूत ठरल्याने दापोली पोलीस ठाण्यात अपघाता गुन्हा दाखल करण्यात आला आहे.
