लांजा:-तालुक्यातील तळवडे येथे बिबट्याने गुरांच्या कळपावर केलेल्या हल्ल्यात एक गाय मृत्युमुखी पडली, तर एक गाय गंभीर जखमी झाली.
येथील शेतकरी रूपेश प्रकाश पाटोळे आणि सुशांत दत्ताराम पाटोळे या शेतकऱ्यांचे नुकसान झाले आहे. सकाळी गुरे चारण्यासाठी तळवडे मळाबांध येथे सोडण्यात आली होती. सकाळी ९ वाजता बिबट्याने गुरांच्या कळपावर हल्ला केला. त्यात रूपेश पाटोळे यांची गाय मृत्यूमुखी पडली, तर सुशांत पाटोळे यांची गाय गंभीर जखमी झाली.
गुरे सैरावैरा झाल्याने बाजूला असलेल्या ग्रामस्थांनी घटनास्थळी धाव घेतली. तातडीने वनाधिकारी आणि पशुवैद्यकीय अधिकारी यांना पाचारण करण्यात आले. तळवडे गावी बिबट्याचा वावर आहे. वनविभागाने या ठिकाणी पिंजरा लावावा, अशी मागणी ग्रामपंचायत सदस्य मुन्ना पाटोळे यांनी केली आहे. तसेच दोन दिवसांपूर्वी लांजा-कोर्ले रस्त्यावर सॉ मिलनजीक सकाळी साडेसहा वाजता रस्ता ओलांडून जाताना बिबट्याचे दर्शन मॉर्निंगवॉकला जाणाऱ्या लोकांना झाले. दिवसाढवळ्या बिबट्या राजरोसपणे नागरी वस्तीत वावर करू लागल्यामुळे ग्रामस्थांमध्ये भीतीचे वातावरण आहे.
