रत्नागिरी जयगड येथील घटना
रत्नागिरी:-तालुक्यातील जयगड दीपगृह येथील अधिकाऱ्याला कर्मचाऱ्याने मारहाण केल्याचा प्रकार समोर आला आहे. ही घटना मंगळवारी सकाळी 7.30च्या सुमारास घडली. अजितकुमार गुप्ता (29, रा.जयगड, मूळ उत्तरप्रदेश) असे या अधिकाऱ्याचे नाव आहे. या प्रकरणी गुप्ता यांनी कर्मचाऱ्याविरुद्ध जयगड पोलिसात गुन्हा दाखल केला.
गजानन नंदकुमार माने (48, रा.जयगड सडेवारी) असे मारहाण करणाऱ्या कर्मचाऱ्याचे नाव आहे त्याच्याविरुद्ध जयगड पोलिसात गुन्हा दाखल करण्यात आला. तक्रारदार अजितकुमार गुप्ता हे जयगड दीपगृह येथे नौकाचालन सहाय्यक या पदावर काम करतात तर गजानन माने हे सफाई कामगार आहेत. गजानन याने आपल्याला सुट्टी हवी असल्याची विनंती गुप्ता यांना केली होती. यावेळी गुप्ता यांनी माने यांच्या सुट्टीबाबत वरिष्ठ कार्यालयाला कळविले. गुप्ता यांनी सुट्टीचा विषय वरिष्ठ कार्यालयाला कळविल्याने माने यांनी कार्यालयात जावून जाब विचारला. यावेळी 3 दिवसांपेक्षा जास्त दिवस सुट्टी असल्यास वरिष्ठ कार्यालयाला मला कळवावे लागते, असे गुप्ता यांनी सांगितले. या उत्तराने समाधान न झाल्याने माने यांनी त्यांच्याशी वाद घातला तसेच गुप्ता यांना मारहाण केली, अशी तक्रार जयगड पोलिसात दाखल करण्यात आली आहे.
