गुहागर:-विजांच्या कडकडाटासह सायंकाळी हजेरी लावणाऱ्या पावसाने गुहागर तालुक्यातील असगोली, वेलदूर येथे लाखो रूपयाचे नुकसान केले आहे. वीज पडल्याने घरातील वायरींग, घरातील वीजेवर चालणारी उपकरणे यांचे नुकसान झाले.
तालुक्यातील वेलदूर जावळेवाडी येथील बबन देवजी जावळे यांच्या घरावर वीज कोसळून घराचे वीजेचे सर्व वायरींग जळून नुकसान झाले आहे. येथील नुकसानीचा पंचनामा करण्यात आला असून सुमारे 6500 रूपयाचे नुकसान झाले आहे. त्याचबरोबर असगोली येथील ग्रामपंचायतीच्या बाजुला बौद्धवाडी येथे नारळाच्या झाडावर वीज पडून आजुबाजुच्या 10 कुटुंबामधील टीव्ही, फ्रीज व इतर इलेक्ट्रॉनिक साहित्य जळून नुकसान झाले आहे. रात्री उशीरापर्यंत त्याठिकाणी वीज पुरवठा खंडीत झाला होता. याअगोदर शुक्रवारी साखरी आगर येथील सार्वजनिक पाणी पुरवठा योजनेची पाण्याच्या टाकीवर वीज पडून 10 हजार लिटर टाकी फुटून नुकसान झाले होते. सोमवारीही सायंकाळी वीजांच्या कडकडाटासह पावसाने हजेरी लावली. दरम्याने पावसाने जोर कायम ठेवल्याने हळवी भातशेतीचे मोठे नुकसान झाले आहे.
