खेड : कोकण मार्गावरून धावणाऱ्या रत्नागिरी-दिवा पॅसेंजरमध्ये चढत असताना खाली पडून तरूण गंभीररित्या जखमी झाल्याची घटना शनिवारी सकाळी 9.30 च्या सुमारास येथील स्थानकात घडली. चंदन शांताराम जाधव (रा. पुरे-खेड) असे जखमी तरुणाचे नाव आहे. उपचारासाठी तातडीने कळंबणी उपजिल्हा रूग्णालयात दाखल करण्यात आले.
गणेशोत्सवासाठी गावी आलेला चंदन जाधव हा मुंबईला जाण्यासाठी खेड स्थानकात शनिवारी सकाळी आला होता. रत्नागिरी-दिवा पॅसेंजर स्थानकात आली असता ट्रेनमध्ये चढत असताना तो खाली पडला. या अपघातात त्याच्या पाठीला गंभीर दुखापती झाल्या. या बाबत रेल्वे प्रशासनाने येथील पोलीस स्थानकात कळवल्यानंतर पोलीस घटनास्थळी दाखल झाले. त्याला कळंबणी उपजिल्हा रूग्णालयात उपचारासाठी दाखल करण्यात आले.
