चिपळूण:- चिपळुणात भरदिवसा महिलेच्या घरात घुसून ठार मारण्याचा प्रयत्न झाल्याचा धक्कादायक प्रकार समोर आला आहे. घराचा दरवाजा न उघडल्यामुळे सबंधित महिला बचावली. अंगात काळा शर्ट व तोंडाला मास्क परिधान केलेल्या चार अज्ञातांनी त्या महिलेला ठार मारण्याची धमकी दिल्याची घटना शुक्रवार 20 रोजी अलोरे-देवरेवाडी परिसरात घडली. अलोरे-शिरगाव पोलीस ठाण्यात त्या चार जणांविरोधात गुन्हा दाखल करण्यात आला आहे.
पोलिसांनी दिलेल्या माहितीनुसार, संबंधित महिला घरी असताना चार अज्ञातांपैकी दोघांनी त्या महिलेच्या घराबाहेर येऊन तिच्या घराचा दरवाजा ठोठावला. त्यानंतर दरवाजा उघड, दरवाजा नाही उघडलास तर तुला मारून टाकू, अशी धमकी दिली. त्यानंतर त्या अज्ञातांनी महिलेच्या घराच्या खिडकी खाली असलेला गवत कापायचा विळा उचलून महिलेवर फेकून मारला. मात्र तो त्या महिलेला न लागता खाली पडला. यावेळी त्या अज्ञातापैकी एकाने त्याचा हात खिडकीच्या आत घातला. तो पकडतेवेळी त्या महिलेच्या हात खिडकीच्या गजाला घासल्याने महिलेच्या हाताला दुखापत झाली. या अज्ञात चार जणांनी अंगात काळे शर्ट परिधान केले होते, याशिवाय त्याच्या तोंडाला मास्क होते. 20 ते 25 वयोगटातील हे तरुण होते असे त्या महिलेने म्हटले आहे. या प्रकरणी त्यांच्यावर गुन्हा दाखल करण्यात आला आहे.
