खेड – मुंबई गोवा महामार्गावरील भोस्ते घाटात रस्त्याशेजारी असणाऱ्या जंगलात काल बुधवारी मानवी कवटी आढळून आल्याने चर्चांना एकच उधाण आले आहे. नेमकी ही आत्महत्या आहे की घातपात अशी दबक्या आवाजात चर्चा आहे. तसेच त्याच जंगलात एका झाडाला दोरी लटकल्याची देखील पोलिसांच्या निदर्शनास आले.
या ठिकाणी पोलिसांना एक बॅग देखील सापडली असून रेनकोट देखील सापडला आहे. नेमका हा सापळा कुणाचा आहे हे अद्याप स्पष्ट झाले नसले तरी हा पुरुषचा सापळा असल्याचे बोलले जात आहे नेमका हा सापळा या ठिकाणी कसा आला का कोणी आणला असे एक ना अनेक प्रश्न उपस्थित होत आहेत. या ठिकाणी झाडाला आढळलेली दोरी व कुजलेल्या अवस्थेत आढळलेली कवटी यावरून आत्महत्या केल्याचा प्राथमिक अंदाज लावण्यात येत असला तरी या ठिकाणी सापडलेली बॅग व रेनकोट कोणाचा? असा प्रश्न उपस्थित होत आहे. इतक्या घनदाट जंगलात हा कुठून आला आणि कशासाठी आला हे सर्व प्रश्न अनुत्तरीतच आहेत या सर्व प्रश्नांची उत्तरे पोलीस तपासानंतरच स्पष्ट होतील.
