तुषार पाचलकर / राजापूर:-मुंबई-गोवा महामार्गावर वाटूळ धनगरवाडी येथे गोव्याकडून मुंबईकडे भरधाव वेगात जाणाऱ्या क्रेटा गाडीने धडक दिल्याने तीन म्हशींचा जागीच मृत्यू झाला असून एक म्हैस गंभीर जखमी झाली आहे. हा अपघात शुक्रवारी सायंकाळी 7 च्या दरम्यान घडला. या अपघातात शेतकरी लवू गोविंद गोरे यांचे सुमारे 4 लाख 10 हजाराचे नुकसान झाल्याची माहिती पोलिसांनी दिली.या प्रकरणी लवू गोविंद गोरे यांनी राजापूर पोलीस स्थानकात फिर्याद दिली.
त्यांनी म्हटले आहे, आपला म्हशी पालनाचा व्यवसाय असून शुक्रवारी सायंकाळी आपण ही जनावरे शेतातून घराकडे जात असताना गोव्याकडून मुंबईच्या दिशेने जाणाऱ्या भरधाव क्रेटा गाडीने (क्र.एम.एच. 03, सीएस 2644) जोरदार धडक दिल्याने तीन म्हशींचा जागीच मृत्यू झाला. तर एक म्हैस गंभीर जखमी झाली आहे. यामध्ये क्रेटा गाडीचे देखील मोठ्या प्रमाणावर नुकसान झाले. या अपघातात दुभत्या म्हशींचा मृत्यू झाल्याने शेतकऱ्यावर आर्थिक संकट कोसळले आहे. या प्रकरणी राजापूर पोलिसांनी क्रेटा चालक अमोल अनिल आचरेकर (34 रा. गुरामवाड कट्टा ता. मालवण जि. सिंधुदुर्ग) याच्याविरोधात गुन्हा दाखल केला आहे. या प्रकरणी अधीक तपास राजापूर पोलीस करीत आहेत. या घटनेची माहिती मिळताच राजापूर पोलीस निरीक्षक राजाराम चव्हाण यांच्यासह पशुवैद्यकीय अधिकारी किनरे यांनी घटनास्थळी जावून पाहणी करून पंचनामा केला.
