संगमेश्वर /एजाज पटेल
मुंबई -गोवा राष्ट्रीय महामार्गावरील आरवली येथे महिंद्रा पिकअप आणि मारूती ओम्नी यांच्यात आज रविवार 1 सप्टेंबर रोजी सकाळी 8 वाजण्याच्या सुमारास अपघात झाला. या अपघातात मारूती ओमनी चालक दिलशाद अन्सारी ( रा. नावडी) हा जखमी झाला. तर पिकअप चालक किरकोळ जखमी झाला.
सविस्तर वृत्त असे की, पिकअप चालक विशाल कोळे (25, मुंबई ) हा आपल्या ताब्यातील महेंद्रा पिकअप MH47/BL/3316 ही गाडी घेऊन अंधेरी कार्गो येथून गोवा फोंडा येथे जात होता. संगमेश्वर आरवली येथे समोरून येणाऱ्या मारुती ओम्नी ( MH08/AN/1055) यांच्यात समोरासमोर अपघात झाला. या अपघातात दिलशाद अन्सारी याला गंभीर दुखापत झाली असून त्याला खासगी वाहनाने डेरवण येथील खासगी दवाखान्यात उपचारासाठी हलवण्यात आले आहे. तर पिकअप गाडी चालक विशाल कोळे याला किरकोळ दुखापत झाली आहे.
अपघाताची माहिती मिळताच माखजन पोलीस दूरक्षेत्राचे पोलीस उपनिरीक्षक विवेक साळवी व त्यांचे सहकारी पोलीस यांनी तातडीने घटनास्थळी दाखल होत.अपघाताचा पंचनामा करून अपघातस्थळी दोन्ही बाजूची रखडलेली वाहतूक सुरळीत केली. या अपघातात दोन्ही गाड्यांचे नुकसान झाले असून अपघात संदर्भातील अधिक तपास पोलीस उपनिरीक्षक विवेक साळवी करत आहेत.
