चिपळूण रेल्वे स्थानकातील प्रकार, हजारो प्रवाशांना धरले वेठीस
चिपळूण:-कोकण रेल्वे मार्गावर धावणाऱ्या मंगला एक्सप्रेसमधून एका प्रवशांने आपल्या हरवलेल्या वस्तूसाठी चक्क रेल्वेची चेन ओढून ट्रेन थांबवली. आणि हजारो प्रवाशांना वेठीस धरले.
ही घटना चिपळूण हद्दीतील धामणदिवी बोगद्यानजिक गुरूवारी सकाळी १० वाजताच्या सुमारास घडली.
कोकण रेल्वेतून प्रवास करताना अनेकदा काही प्रवासी रेल्वे बोगीच्या दरवाज्यात अथवा खिडकीजवळ मोबाईल घेऊन बसतात. तेथेच चार्जीगची व्यवस्था असल्याने एकाचवेळी काही मोबाईल तेथे चार्जिंगसाठी ठेवले जातात. अशाच एका प्रवाशाच्या हातातील मोबाईल अचानक रेल्वेतून खाली पडला. त्याने वेळ न घालवता तत्काळ रेल्वेची चेन खेचली आणि गाडी थांबवली. धामणदिवी बोगद्यातून बाहेर आल्यावर गाडी थांबली होती. त्यामुळे सुरुवातीला गाडी नेमकी कशासाठी थांबवली हे कर्मचाऱ्यांनाही समजू शकले नाही. मात्र याविषयीची माहिती तत्काळ रेल्वेच्या यंत्रणेला देण्यात आली. त्यामुळे काहीशी तारांबळ उडाली. त्यानंतर एका प्रवाशाचा मोबाईल रेल्वेतून खाली पडल्याची खात्री पटताच काही वेळाने ही गाडी पुढील प्रवासासाठी मार्गस्थ करण्यात आली.