चिपळूण:-कोठेही आग लागल्यानंतर अग्निशमन बंब पोहचण्यापूर्वीच आता बुलेट फायर फायटर दुचाकी तेथे जाणार आहेत. त्यामुळे गल्लीबोळातील लहान आगी विझवण्यासह मोठ्या आगींना रोखून ठेवणेही सहज शक्य होणार आहे. अशा दोन बुलेट दुचाकी येथील नगर परिषदेला प्राप्त झाल्या आहेत.
शहर परिसरात अनेक कारणांमुळे लहान-मोठ्या स्वरूपाच्या आगी लागण्याचे प्रकार सातत्याने घडतातः काही आगी शॉर्टसर्किट, तर काही वणवे व अन्य कारणांनी लागतात. त्या विझवण्यासाठी नगर परिषदेकडे मोठा अग्निशमन बंब आहे. त्यामुळे लवकरच नवा व आकाराने लहान असणारा बंब मिळावा म्हणून नगर परिषद शासनाकडे प्रस्ताव पाठवणार आहे. सध्याचा विचार करता एखाद्या ठिकाणी आग लागल्यानंतर त्याची माहिती नगर परिषदेला मिळताच तेथे तातडीने बंब पाठवला जातो. मात्र, शहरातील अरुंद रस्ते, कायम असणारी वाहतूक कोंडी यामुळे बंब वेळेत पोहचण्यास अनेकदा विलंब होतो. या दरम्यान लहान असलेल्या आगी नागरिक अनेक उपाय करून विझवतात. तर काहीवेळा त्यांना रोखून ठेवतात. त्यानंतर बंब पोहचल्यावर आग पूर्णपणे विझवली जाते. मात्र, बंब जाण्यापूर्वी नागरिकांची सुरू असलेली धडपड तशी धोक्याचीच असते. त्यामुळे आता आगीची माहिती मिळताच बंबापूर्वी या बुलेट फायर फायटर दुचाकी तेथे पोहचणार आहेत. त्यामुळे त्यावर असलेल्या गॅसच्या नळकांड्या व अन्य सुविधांमुळे लहान स्वरूपाच्या आगी विझवणे शक्य होणार असून मोठ्या आगींना नियंत्रणात ठेवता येणार आहे. बंबाला मार्ग मोकळा करून देण्यासाठीही या बुलेट फायर फायटर दुचाकी महत्वाच्या ठरणार आहेत. त्यामुळे साहजिकच संबधितांचे होणारे नुकसान काहीअंशी कमी होणार आहे. शासनाच्या अग्निशमन विभागाने २९८ बुलेट फायर फायटर दुचाकी खरेदी केल्या असून त्या राज्यातील मोठ्या नगर परिषदांना दिल्या जात आहेत. त्यातील प्रत्येकी २ दुचाकी चिपळूण व रत्नागिरी नगर परिषदांसाठी आल्या आहेत. यांचा वापर कसा करावा याची माहिती संबधित विभागाच्या अधिकारी, कर्मचाऱ्यांना देण्यासाठी तज्ज्ञ दोन दिवसात येणार आहेत. त्यानंतर याचा प्रत्यक्ष वापर केला जाणार आहे. बुलेट फायर फायटर दुचाकी फायद्याच्या शहराचा विचार करता आगीच्या घटना घडल्यास प्राथमिक स्वरुपाच्या उपाययोजना करण्यासाठी शासनाने दिलेल्या बुलेट फायर फायटर दुचाकी महत्वाच्या ठरणार आहेत. विशाल भोसले, मुख्याधिकारी नगर परिषद चिपळूण
