चिपळूण:- अतिवेगाने कार चालवून दुस-या कारला धडक देऊन अपघात झाल्याची घटना कुंभार्ली घाटात शनिवारी घडली. याप्रकरणी धडक देणारा कार चालक संदिप ओसवाल (चिपळूण) याच्यावर अलोरे-शिरगाव पोलिस स्थानकात गुन्हा दाखल करण्यात आला आहे.
पोलिसांनी दिलेल्या माहितीनुसार हर्षद परब हे त्यांच्या कारने चिपळूण ते सांगली असे जात होते. ते कुंभार्ली घाटात शनिवारी सकाळी 10.15 वाजण्याच्या सुमारास आले असता याच दरम्यान संदीप ओसवाल हा त्याच्या ताब्यातील कार कराड बाजूकडून कुंभार्ली घाटातून प्रवास करत होता. तो या घाटातील एका वळणावर आला असता त्याने कार अतिवेगाने चालवून परब याच्या कारला धडक दिली. यात त्याच्या कारचे 1 लाख 30 हजाराचे नुकसान झाले आहे. या अपघाताप्रकरणी ओसवाल याच्यावर अलोरे-शिरगाव पोलिस स्थानकात गुन्हा दाखल करण्यात आला आहे.
