मारहाण करणारा आणि मार खाणाऱ्यानेच केली तडजोड
रत्नागिरी:-मी गांजा विकत असल्याची टीप पोलिसांना देतोस काय? तुला ठार मारतो असे म्हणत मारहाण केली. गाडीच्या चावीने गळ्याखाली, छातीवर जबरदस्त मारल्याने दुखापत झाली अशा आशयाची तक्रार दाखल झाल्यावर पोलिसांनी तपास पूर्ण केला. न्यायालयात तरुणाविरुध्द आरोपपत्र दाखल केले. परंतु सबळ पुराव्याअभावी न्यायालयाने आरोपीची निर्दोष मुक्तता केली.
सहल मुनीर कर्लेकर (हयातनगर, रत्नागिरी) हा जयगड येथील तटरक्षक दलाचे देखभाल दुरुस्तीचे काम करतो. त्याला कंपनीने स्वीफ्ट डिझायर गाडी वापरण्यास दिली. 4 जानेवारी 2020 रोजी रात्री 12.30 वाजण्याच्या सुमारास सहल हा उद्यमनगर येथे घरी येत असताना शफाकत हसन आदम राजपुरकर (39, साखरतर, रत्नागिरी) याने तेथे येऊन विचारले की, मी दोन दिवसांपूर्वी तुला फोन करत होतो. तू फोन का उपचलत नाहीस. राजपुरकर याने पैशाची मागणी केली. तसेच मी गांजा विकतो अशी टीप पोलिसांना देतोस काय, तुला ठार मारतो अशी धमकी सहल याला दिली. यावेळी बाचाबाची झाली. राजपूरकर याने गाडीच्या चावीने सहल याच्या गळ्याखाली जोरदार मारले. त्यात दुखापती झाल्या. हाताच्या ठोशाने मारहाण केली, अशी तक्रार सहल याने पोलिसांकडे नोंदवली.
रत्नागिरी शहर पोलिसांनी गुन्हा नोंदवून हवालदार बी. एन. कदम यांनी तपास सुरु केला. घटनास्थळ पंचनामा, नकाशा, छायाचित्रे, आरोपीची अंगझडती, साक्षीदारांची टिपणे नोंदवली. तपास पूर्ण झाल्यानंतर दोषारोपपत्र न्यायालयात दाखल केले. न्यायालयात घटनास्थळ पंच म्हणून मुजनबीन साखरकर, शंकर गणपत वासावे, अंगझडती पंच ओंकार शेट्ये, फिर्यादी सहल कर्लेकर यांच्या साक्षी नोंदवण्यात आल्या. घटनास्थळ पंचनामा, अंगझडती पंचनामा, लेखी फिर्याद आदी दस्तऐवज पुरावा म्हणून सादर करण्यात आले.
सुनावणी अखेर मुख्य न्यायदंडाधिकारी माधव संगप्पा बोराळे यांनी निकालपत्र दिले. या निकालपत्रात नमूद करण्यात आले की, फिर्यादी सहल आणि आरोपी शफाकत यांच्यामध्ये आपापसात तडजोड झाली आहे. तशी पुरशीच अभिलेखावर दाखल आहे. मात्र फौजदारी प्रकिया संहितेअन्वये हे प्रकरण काढून घेता येण्याजोगे नसल्याने खटला चालवण्यात आला. 4 साक्षीदारांच्या साक्षी झाल्यानंतर पुरावा बंद करण्यात आला. घटनास्थळ पंचनामा आपल्या समोर झाल्याचे पंचांनी नाकारले. पंचनाम्यात काय नमूद केले आहे हे वाचण्याचा योग आला नाही, असे घटनास्थळ पंचनाम्यावर स्वाक्षरी करणाऱ्या दुसऱ्या पंचाने सांगितले. आरोपीला यापूर्वी पाहिले नाही, आज प्रथमच पहात आहे,असे अंगझडती पंचांनी न्यायालयात सांगितले. या साक्षी विश्वासार्ह नसल्याचे न्यायाधिशांनी नमूद केले. अखेर पुराव्याअभावी आरोपीची न्यायालयाने मुक्तता केली. हा घटला 4 वर्षे 23 दिवस चालला.
