चिपळूण:-मुंबईत नुकत्याच झालेल्या राज्यस्तरावरील कॅप्टन ईझिकल मेमोरियल शूटिंग चॅम्पियनशिप स्पर्धेत सावर्डे (ता. चिपळूण) येथील पूजा चव्हाण हिने महिलांच्या ५० मीटर रायफल प्रकारातील ज्युनियर गटात वैयक्तिक सुवर्णपदक पटकावले आहे.
मुंबईत वरळी येथे महाराष्ट्र रायफल असोसिएशनमध्ये नवोदित शूटर्ससाठी ही स्पर्धा आयोजित करण्यात आली होती. त्यामध्ये रत्नदुर्ग पिस्टल अँड रायफल शूटिंग क्लब ऑफ रत्नागिरीची सभासद पूजा चव्हाण सहभागी झाली होती. तिने आपल्या गटातून वैयक्तिक प्रकारांमध्ये सुवर्णपदक पटकावत स्पर्धेत बाजी मारली.महाराष्ट्र रायफल असोसिएशनचे अध्यक्ष अशोक पंडित तसेच सचिव शीला कानुगो यांच्या हस्ते स्पर्धेतील विजेत्यांना गौरवण्यात आले.
