रत्नागिरी:-तालुक्यातील एकाविरोधात महिला विनयभंग केल्याच्या तक्रारीवरून ग्रामीण पोलिसांकडे गुन्हा दाखल करण्यात आला आहे. एका अंशकालीन स्त्री परिचर महिलेकडून 2 लाख घेऊन ते परत न देता तिला अश्लील शिवीगाळ केल्याच्या आरोपाखाली हा गुन्हा दाखल करण्यात आला आहे.

या प्रकरणी संबंधित महिलेने या बाबत ग्रामीण पोलीस स्थानकात तक्रार दाखल केली आहे. महिलेच्या तक्रारीनुसार सुवेज सिताराम कांबळे याच्याविरोधात ग्रामीण पोलिसांनी गुन्हा दाखल केला आहे. त्या महिलेच्या पतीच्या मृत्यूनंतर त्यांची पेन्शन चालू होण्यासाठी त्याने पीडित महिलेला मदत केली होती. पतीच्या मृत्यूनंतर विम्याचे पैसे मिळाल्याचे सुवेज कांबळे याला माहित होते आणि म्हणूनच सुवेज याने पीडित महिलेकडे पैसे मागण्यास सुरुवात केली. पीडित महिलेने सुवेज याला एकूण दोन लाख रुपये ओळखीवर दिले. यापैकी केवळ दहा ते पंधरा हजार रुपये सुवेज याने पीडित महिलेला परत केले. दरम्यान पीडित महिला आजारी असताना तिने सुवेजच्या मोबाईलवर फोन करून पैशांची मागणी केली असता पीडित महिलेला अत्यंत खालच्या शब्दात शिवीगाळ केली. तसेच घरी येऊन मुलांसोबतही शिवीगाळ केली, अशी तक्रार पीडित महिलेने केली. उपचारानंतर देखील पैशांची मागणी केली असता सुवेजने शिवीगाळ व धमकी दिल्याने पीडित महिलेने ही बाब त्यांच्या समाजातील काही लोकांच्या कानावर घातली. यावेळी झालेल्या बैठकीतही सुवेज याने पैशांबाबत उडवाउडवीची उत्तरे देत पीडित महिलेची बदनामी केली. या प्रकरणी पीडित महिलेने ग्रामीण पोलीस स्थानकात तक्रार दाखल केली आहे. अधिक तपास ग्रामीण पोलीस करत आहेत.