चिपळूण:-शहर परिसरात अमली पदार्थ विक्री करणाऱ्यांचे रॅकेटच पुन्हा एकदा सक्रिय झाले आहे. खेर्डी बाजारपेठेतील टपरीवरील विक्रेत्याकडून गांजाच्या ११ पुड्या जप्त केल्यानंतर, दुसऱ्याच दिवशी शनिवारी सावर्डे पोलिसांनी एका महिलेला ताब्यात घेत तिच्या घरातून पाच किलोहून अधिक गांजा जप्त केला आहे. त्यामुळे अमली पदार्थविरोधी मोहीम येथील पोलिसांनी आणखी तीव्र केली आहे. या प्रकरणाच्या मुळाशी पोहोचण्याचा प्रयत्न येथील पोलिस यंत्रणेने सुरू केला आहे. या मोहिमेमुळे गांजा विक्रेत्यांसह अमली पदार्थ सेवन करणाऱ्यांचेही धाबे दणाणले आहेत.
मीनाक्षी बाळू जयस्वाल (वय ५१, सावर्डे बाजारपेठ) असे पोलिसांनी ताब्यात घेतलेल्या महिलेचे नाव आहे. खेर्डी माळेवाडी येथील रहिवासी असलेला साईराज कदम याच्या चौकशीत गांजाच्या ५० ग्रॅम वजनाच्या ११ पुड्या शुक्रवारी आढळून आल्या.
सुमारे २२०० रुपयांचा गांजा जप्त केला. त्या पाठोपाठ सावर्डे पोलिसांनाही मीनाक्षी जयस्वाल हिच्याविषयी गोपनीय माहिती मिळाली होती. त्याप्रमाणे सावर्डे पोलिस निरीक्षक जयंत गायकवाड यांच्या मार्गदर्शनाखाली पोलिसांनी शनिवारी सकाळी सापळा रचून मीनाक्षी जयस्वाल हिला ताब्यात घेतले. तसेच तिच्या घराची झडती घेतल्यानंतर तेथे पाच किलोपेक्षा अधिक गांजा आढळून आला. चिपळूण शहरात अजूनही पारंपरिक पद्धतीने गांजा विक्रीचा व्यवसाय केला जातो. या व्यवसायात आता काही महिलाही पुढे आल्या आहेत. गतवर्षी शहरातील पाग भागातील एका बॉडीबिल्डरला ताब्यात घेतले होते. त्याचवेळी गांजा विक्रीमध्ये एक दोन महिलाही सक्रिय असल्याचे स्पष्ट झाले होते. त्याही तरुणांना आमिष दाखवून गांजाचा पुरवठा करत होत्या.
फरशीतिठा परिसरातील एक महिला शहरातील गोवळकोट परिसरात गांजा पुरवठा करत असल्याची माहिती काही नागरिकाने पोलिसांना दिली होती; मात्र आता सावर्डे येथे महिला गांजा विक्री करत असल्याची माहिती पोलिसांना मिळाली होती. त्याप्रमाणे तत्काळ सावर्डे पोलिसांनी कारवाई करून मीनाक्षी जयस्वाल हिला ताब्यात घेत गांजा जप्त केला आहे. सावर्डे पोलिसांची ही कारवाई उशिरापर्यंत सुरू होती.
चिपळुणात महिलेकडे गांजा सापडल्याने खळबळ
