“तुमच्या वयाचा आदर करतो पण उठ सुट..”; निलेश राणे भुजबळांवर संतापले

मुंबई:-राष्ट्रवादीच्या अजित पवार गटाने सोमवारी मुंबईत पक्षाच्या कार्यकारिणीची बैठक आयोजित केली होती. या सभेदरम्यान अजित पवार गटाचे ज्येष्ठ नेते, मंत्री छगन भुजबळ यांनी महायुतीकडून मिळणाऱ्या जागा वाटपाबाबत मोठे विधान केले होते.

तसेच ‘400 पार’च्या घोषणेमुळे महायुतीचे नुकसान झाले’, असे विधानही छगन भुजबळ यांनी केले.

यानंतर आता महायुतीतील मतभेद समोर आले आहेत. माजी खासदार निलेश राणे यांनी छगन भुजबळ यांना आवरले पाहिजे असे म्हणत आपला संताप व्यक्त केला आहे.

निलेश राणे काय म्हणाले?

भाजपाचे नेते निलेश राणे यांनी ट्वीट करत लिहिले की, “श्री छगन भुजबळांना आवरलं पाहिजे, मी भारतीय जनता पक्षाचा एक लहान कार्यकर्ता असलो तरी आम्ही नेहमी भुजबळांचं का ऐकून घ्यावं??? मनोज जरांगे पाटील यांचे आंदोलन सुरू असताना सुद्धा आम्ही त्यांची बाजू घेतली नाही, नेहमी नेहमी भुजबळ हे बीजेपीला डिवचत असतात ही त्यांची भूमिका बरोबर नाही. आम्हाला असंच पाहिजे आम्हाला तसंच पाहिजे, युती आघाड्या करून ही भाषा एका नेत्याला शोभत नाही.”

पुढे ते म्हणाले, “आम्ही तुमच्या वयाचा आदर करतो पण उठ सूट कोण युती बिघडवायची भाषा बोलत असेल तर सहन होत नाही आणि होणार नाही कारण भारतीय जनता पक्षाने सर्वात मोठा पक्ष असून सुद्धा नेहमी सकारात्मक भूमिका ठेवली आहे,” असे म्हणत निलेश राणे यांनी भुजबळ यांच्यावर संताप व्यक्त केला.

काय म्हणाले होते छगन भुजबळ?

लोकसभा निवडणुकीपूर्वी भाजपने ‘अब की बार 400 पार’चा नारा दिल्याने लोकसभा निवडणुकीत भाजप आणि मित्रपक्षांसमोर आव्हान निर्माण झाले. या घोषणेमुळे एकप्रकारे एनडीए आघाडीचे नुकसान झाले. एनडीए 400 पार गेल्यामुळे देशाचे संविधान बदलणार नाही, ही गोष्ट लोकांना पटवून देताना आमच्या नाकीनऊ आले. स्वत: पंतप्रधान नरेंद्र मोदी यांना अनेक मुलाखती आणि प्रचारसभांमधून हे पटवून द्यावे लागत आहे,” असे वक्तव्य छगन भुजबळ म्हणाले होते.

तर विधानसभेतील जागा वाटपाबाबत छगन भुजबळ म्हणाले की, “लोकसभेसारखी विधानसभेला खाटाटोप होता कामा नये, आम्हाला एवढ्या जागा हव्या हे त्यांना सांगाव लागेल. 80-90 जागा मिळाल्या, तर 50-60 निवडून येणार. तुमचे 50 आहेत, तर 50 घ्या, असं होता कामा नये. आमचा वाटा आम्हाला मिळाला पाहिजे,” असं छगन भुजबळ म्हणाले.