लांजा:-अज्ञात वाहनाने मोटरसायकलला जोरदार धडक दिल्याने झालेल्या अपघातात एकाचा जागीच तर दुसऱ्याचा रत्नागिरी येथे उपचारासाठी नेताना मृत्यू होण्याची घटना रविवारी दुपारी दोन वाजण्याच्या सुमारास लांजा-दाभोळे मार्गावरील आसगे नजीकच्या वझऱ्याचा पऱ्यावरील पुलाजवळ घडली.
याबाबत पोलिसांनी दिलेल्या माहितीनुसार, लांजा तालुक्यातील गोविळ जाधववाडी येथील रहिवासी असलेले प्रकाश साबाजी जाधव (५५) आणि शाम अर्जुन जाधव (५०) हे तळवडे येथे असलेल्या साखरपुड्याच्या कार्यक्रमानिमित्त आपल्या मोटरसायकलने गोविळ जाधववाडी येथून तळवडे येथे जात होते. दुपारी २ वाजण्याच्या सुमारास लांजा-दाभोळे मार्गावरील आसगे येथील वझऱ्याच्या पऱ्यावरील पुलाजवळ एका वळणावर त्यांच्या मोटरसायकलला अज्ञात वाहनाने समोरून धडक दिल्याने या धडकेत मोटरसायकल चालविणारे शाम अर्जुन जाधव यांचा जागीच मृत्यू झाला. तर प्रकाश साबाजी जाधव हे गंभीर जखमी झाले. अपघातानंतर दोघेही रस्त्याच्या बाजूला रक्ताच्या थारोळ्यात पडलेल्या अवस्थेत होते. याच दरम्यान या मार्गावरून जाणाऱ्या अज्ञात व्यक्तीने याबाबतची माहिती १०८ रुग्णवाहिकेला दिल्यानंतर या रुग्णवाहिकेने दोघांनाही जखमी अवस्थेत लांजा ग्रामीण रुग्णालयात उपचारासाठी दाखल करण्यात आले. याठिकाणी अपघातातील दोघा जखमींपैकी शाम जाधव यांना वैद्यकीय अधिकाऱ्यांनी तपासाअंती मृत म्हणून घोषित केले, तर प्रकाश जाधव यांना गंभीर दुखापत झाल्याने त्यांना अधिक उपचारासाठी रत्नागिरी जिल्हा शासकीय रुग्णालयात नेण्यात येत होते. मात्र वाटेतच त्यांचा मृत्यू झाला. अपघातात शाम जाधव यांच्या डोक्याला गंभीर दुखापत झाल्याने त्यांचा जागीच मृत्यू झाला.
दरम्यान, या अपघातप्रकरणी लांजा पोलीस ठाण्यात अज्ञात वाहनाविरुद्ध गुन्हा दाखल करण्यात आला आहे. याबाबत अधिक तपास पोलीस करत आहेत.
लांजात दुचाकी अपघातात दोघांचा मृत्यू
