कोलाडनजीक नेत्रावती एक्सप्रेसच्या धडकेत तरुणाचा मृत्यू

खेड / प्रतिनिधी:-कोकण रेल्वे मार्गावरील कोलाडनजीक नेत्रावती एक्सप्रेसच्या धडकेत विशाल बाळकृष्ण जाधव (30 रा. मौजे पाले खुर्द, कोलाड) याचा मृत्यू झाला. ऐन शिमगोत्सवात घडलेल्या घटनेने जाधव कुटुंबियांवर दु:खाचा डोंगर कोसळला आहे.

कोकण मार्गावरून धावणाऱ्या 16345 क्रमांकाच्या लोकमान्य टिळक टर्मिनस-तिरूअनंतपूरम नेत्रावती एक्स्प्रेसची धडक बसल्याने त्याचा मृत्यू झाल्याचे समोर आले आहे. मृतदेह रूळावर आढळल्यानंतर गस्त घालणाऱ्या रेल्वे कर्मचाऱ्यांनी वरिष्ठ अधिकाऱ्यांना कळविले. त्यानुसार वरिष्ठ अधिका-यांनी कोलाड पोलीस स्थानकात कळवल्यानंतर पोलीस निरीक्षक मोहिते व सहकारी घटनास्थळी पोहून पंचनामा केला. या प्रकरणी कोलाड पोलीस स्थानकात आकस्मिक मृत्यूची नोंद करण्यात आली आहे. या बाबत अधिक तपास महिला पोलीस नाईक एन. ए. शिर्के करत आहेत.