गुहागर/ प्रतिनिधी:- गुहागर तालुक्यातील अंजनवेल बाजारपेठेतील मशिदी शेजारी असलेले कटलरीसह आइस्क्रीम व खाऊ साहित्याचे दुकान आगीत खाक झाले. आईस्कीमच्या दुकानातील डीप फ्रिजचा कॉम्प्रेसर अधिक तापल्याने त्याचा स्फोट होऊन दुकानाला लागलेल्या आगीत सुमारे पाच लाखाहून अधिक रुपयांचे नुकसान झाले. ही घटना सोमवारी दुपारी 11.45 वाजण्याया सुमारास घडली.
तालुक्यातील अंजनवेल बाजारपेठेमध्ये नदी शेजारी असलेल्या मशिदीसमोर मुख्य रस्त्याच्याकडेला शाबाद आचरेकर यांचे आईसक्रीमसह थंडपेये, खाऊ तसेच त्यास लागून कटलरी साहित्यासह मोबाईल साहित्याचे दुकान आहे. सोमवारी दुपारी 11.45 वाजण्याच्या सुमारास आईस्कीमाया दुकानातील डीप फ्रिजच्या कॉम्प्रेसरचा स्फोट होऊन आगीचा भडका उडाल्याने काही मिनिटात दुकानाचे सर्व साहित्य जळून खाक झाले. भिंतीचे प्लास्टरही आगीने गळून पडले.
दरम्यान, अंजनवेलमधील ग्रामस्थांनी तातडीने घटनास्थळी धाव घेत शेजारील नदीचे पाणी आणून आग आटोक्यात आणली. मात्र तोपर्यंत एका दुकानातील सर्व साहित्य जळून खाक झाले, तर दुसऱ्या दुकानातील अर्धे साहित्य बाहेर काढण्यात ग्रामस्थांना व दुकान मालकांना यश आले.
