दापोलीत वृद्धाचा आकस्मिक मृत्यू

दापोली-दापोली शहरातील आसराचे पूल जवळील डॉ. आंबेडकर चौक येथे येथे 63 वर्षीय वृद्धाचा मृत्यू झाल्याची घटना 3 मार्च रोजी दुपारी 8.30 वाजण्याच्या सुमारास घडली. मकरंद अच्युत भावे असे मृत्यू झालेल्या वृद्धाचे नाव आहे. याबाबतची खबर पूजा प्रसाद साखळकर (45, जालगाव लष्करवाडी) यांनी दिली.

दापोली पोलिसांनी दिलेल्या माहितीनुसार पूजा साखळकर या गजानन महाराज मठातून  घरी जात होत्या. त्यावेळी  त्या दापोली आसराच्या पुलाजवळ डॉ. आंबेडकर चौकात त्यांना लाल रंगाची कार दिसली. ती कार मकरंद भावे यांचीच असल्याची खात्री झाल्यावर गाडी तेथे उभी का आहे हे पाहण्यासाठी त्या गाडीजवळ गेल्या. त्यांनी गाडीत पाहिले असता मकरंद भावे गाडीत ड्रायव्हर सीटच्या बाजूला असलेल्या सीटवर उताणे अवस्थेत झोपलेले दिसले. म्हणून साखळकर यांनी तत्काळ भावे यांची मुलगी शिल्पा भावे हिला फोनवरून याची माहिती दिली. शिल्पा भावे ही पुण्याला असल्याने तिने गाडीचा दरवाजा उघडून भावे यांना उठवण्यास सांगितले. साखळकर यांनी गाडीचा दरवाजा उघडून उठवण्याचा प्रयत्न केला असता भावे यांनी कोणताही प्रतिसाद दिला नाही. त्यांच्या नाकातून रक्त येत असलेले दिसले म्हणून दापोली कोकंबाळी येथे राहणारे महेंद्र टीकारे यांना फोन करून तेथे बोलावून घेतले. महेंद्र टिकारे यांनी सदर परिस्थिती पाहून तत्काळ ऍम्बुलन्स बोलावून मकरंद भावे यांना उपजिल्हा रुग्णालय दापोली येथे दाखल केले. तेथे त्यांची तपासणी केली असता ते मृत असल्याचे घोषित करण्यात आले. याबाबत दापोली पोलीस स्थानकात अकस्मित मृत्यू म्हणून नोंद करण्यात आली असून अधिक तपास दापोली पोलीस करीत आहेत.